ORANJESTAD – Durante conferencia di prensa di MEP diaranson ultimo prensa a puntra e líder di MEP pa su opinión tocnate e constante ataque di desiree Croes contra su persona cu e lo ta un traidor, pasobra el’a saca potret cu parlamentario Andre Bosman na Hulanda.
Lider di MEP a reacciona di e forma aki.
“Mi ta haya cu Desiree Croes mester GROW UP y stop cu e cosnan infantil aki. Mi por bai den historia pa recorda Desiree cu e unico partido traidor na Aruba ta su partido AVP. Pero  mi no ta hasi esey, pasobra mi ta sigur cu e conoce e historia di su partido mihor cumi.
Mescos cu tur otro lider di nos pais, ami tambe mester papia y dialoga cu e politiconan na Hulanda pa logra bienestar pa nos pueblo. Betico Croes den felis memoria tabata un pionero den esaki, y tabata dialogo cu amigo y enemigo, y Mike Eman a sigi su ehempel. Ami no ta comparti tur e ideanan di Andre Bosman, pero esey no kiermeen cu mi no mester dialoga cune.
Bosman ta e vocero pa e partido den gobierno, pa loke ta trata asuntonan di Reino. E ta esun cu ta poniendo presion riba gobierno hulandes pa impone medida tras di medida na Aruba. Ami a splike cu e no por pone asina tanto presion pasobra no ta husto pa e pueblo. Mi a splike cu nos pueblo no por mas. Berdad algo mester wordo hasi, pero e lista di 24 medida cu Mike Eman tin prepara, lo tin un efecto hopi negativo riba henter nos comunidad, siendo cu tin otro alternativa.
Mi a splike cu tin alternativa, entre otro, en bes di a hisa e health tax cu 1% por a djis manda dos minister cas. Esey lo a causa hopi menos dolor na nos pueblo. Otro alternativa ta hinca mas esfuerzo den re-apertura di e refineria.
Mi meta ta pa conbense e politiconan manera Andre Bosman cu nos pueblo awor ta conciente di e mal maneho financiero, pero no ta husto cu ta pueblo mester paga pa e malgastamento di placa di Mike Eman y su ministernan. Algo mester wordo hasi, pero den esaki e prioridad mester ta pa yuda esnan mas vulnerable den nos comunidad.
Y mi meta ta pa conbense tur politico hulandes cu kier pone demasiado presion riba gobierno pa bin cu medida, cu nan mester pensa riba otro alternativa. Esey mi a papia tambe cu sr. Samsom di PvdA, sr. Van Zwol y Minister Plasterk.
Si esey tin Desiree Croes asina nervioso y e unico cos cu e por hasi ta zeur riba un potret, esey ta keda pa su conseinshi. Ami tin otro cos na mi cabes, y mi no ta bai perde tempo na e actitud infantil di Desiree Croes. Aruba ta para dilanti retonan grandi, nos pueblo ta pasando den un sufirmento grandi, ban atende cu e problemanan aki, y stop di zeur riba cosnan infantil”, Evelyn Wever-Croes a duna di conose.

Expresionnan haci den e articulo aki no necesariamente ta refleha opinion di ArenaPoliti.co