Ultimo tempo tin hopi peticion ta drentando pa diferente tipo di permiso cu ta regarda maneho di Ministerio di Transporte. Tin un interes grandi pa e tipo di permiso pa taxi. Pero tin un moratorio cu a wordo anuncia pa un tempo di 10 aña pa limita e cantidad di taxi. Ta trata aki di un cantidad di 450 taxi. Na mes momento e mandatario ta anuncia cu e 450 permisonan aki ta otorga. Kier pa e comunidad ta na altura di esaki mirando cu ainda tin un cantidad di peticion pa permiso di taxi ta drenta diariamente pero mester reitera e hecho cu e 450 permisonan ta alcansa. “Naturalmente semper bo por haci peticion, pero na e momentonan aki, no tin permiso pa nos otorga mirando cu nos a cumpli cu e maximo.” Minister Oduber ta bisa.

Pero esaki ta conta tambe pa T, O y B vergunning como tambe MFA y V vergunning cu ta e autonan di huur, e brommernan y quadracernan di huur. A fiha un maximo den un moratorio cu awor ta conoci di cual lo wanta pa un periodo di 5 aña.

Sr. Oduber ta continua bisando: “Cu desde publicacion di e moratorio, pa un periodo di 6 luna, lo no atende cu e peticionan di e diferente permisonan mentiona. Na momento cu un permiso mester drenta DTP, lo notifica e persona cu ta haci e peticion, cu a haci un anuncio publicamente unda pa 6 luna di tempo lo no trata e peticionan cu ta drenta.”

E mandatario ta finalisa splicando cu naturalmente cu tin personanan cu lo kier entrega nan peticion pa permiso den futuro, pa ora un of otro permiso bin liber pa taxi por ehempel, e ora e peticion lo wordo acepta pa por bay den tramite.

Expresionnan haci den e articulo aki no necesariamente ta refleha opinion di ArenaPoliti.co