ORANJESTAD - Prome Minister Mike Eman y Secretario di Estado Hulandes Wilma Mansveld (Infrastructura y Medio Ambiente) a combersa riba cooperacion entre Hulanda y Aruba, durante un encuentro na Toronto, Canada, como preparacion pa un conferencia climatologico grandi e aña’ki. Aruba ta forma parti di e delegacion di Reino cu ta participando den COP21.

Prome Minister Eman ta na Toronto como keynote speaker durante e “International Economic Forum of the Americas”. Secretario di Estado Mansveld a hiba palabra den e “Climate Summit of the Americas” papiando riba e prijsnan di CO-2 pa por combati cambionan climatologico y encuanto e oportunidadnan economico cu tin ora cu ta atende cu e cambionan climatologico.

Secretario di Estado Mansveld: “E ultimo añanan tabatin cambionan grandi realisa na Aruba den e transicion pa independencia energetico. Aruba ta demostra cu accionnan climatologico y crecemento por bay bon hunto. Asina nan ta un bon ehempel pa otro islanan den Caribe cu ta vulnerabel den caso di un mundo cu subi di temperatura mas di dos grado.”

Gobierno di Aruba a bin ta trahando pa algun aña caba hunto cu Carbon War Room di Richard Branson cu e meta pa haci Aruba completamente clima-neutral na 2020. “Rocky Mountain Institute, TNO di Hulanda y Departamento di Energia di Merca a bira partner cu Aruba pa logra e metanan menciona,” segun Prome Minister Eman. Di e forma aki Aruba ta bira e prome economia duradero di mundo cu ta saca tur su energia for di fuentenan no-convencional.



“Na 2005 nos tabata uza mas di 6000 bari di petrolio pa dia pa produccion di awa y coriente; na 2015 e cantidad di bari di petrolio cu ta rond di 3000 pa dia. Di e forma aki e cantidad di material renovabel ta casi un tercera parti den produccion di awa y coriente.” Reduciendo e uzo di combustibel tradicional na mita den e produccion, a causa cu a baha e gastonan aki cu 85 miyon dollar. Tambe e uzo di diesel a wordo reduci na mita door di creacion di un Parke di Molina di Biento di 30 megawatt. Aworaki tin plannan riba mesa pa construccion di otro Parke di Molina di Biento y un Parke Solar.

“Na 2018 e cantidad di barinan di petrolio necesario ta baha na rond 2500 pa dia y e cantidad di renobabelnan lo ta rond di 50% den produccion di awa y coriente.”

Carbon War Room, Rocky Mountain Institute y Aruba lo ta organisando hunto un ‘Learning Event’ pa ‘Small Island Developing States’ (SIDS), net prome cu inicio di COP21, riba 26-27 october 2015.

Expresionnan haci den e articulo aki no necesariamente ta refleha opinion di ArenaPoliti.co