Si nos digno pueblo di Aruba tuma nota di e actual Gabinete na mando no tin otro conclusion cu nos tin un Democracia Marginal. Un Parlamento cu tey pero no ta wordo respeta pa Gobierno di Mike Eman. Ta cuanto proyecto ta wordo aproba sin e control debido. Tur proyecto grandi di Gobierno no tin e transparencia adecua. Linear park, e renobacion den Caya Betico Croes y e proyecto di Tram ta algun cu a wordo aproba pa e 13 Parlamentarionan di AVP sin e control y estudio debido. Pais Aruba (pueblo) a paga miyones pa un producto inferior. E proyecto di Hospital tambe lo bay den historia di partido AVP un costo sumamente halto sin varios departamento manera un operatie kamer. Na ultimo a conkel cu esaki pa e proyecto sigui su curso cu tur e consecuencianan cu lo bin despues. 

Ta priminti pueblo pa elimina BBO pa gana elección na 2009 anto ta aumenta esaki te na 3.5%. Pero e drama no ta caba akinan, Gobierno no ta pasa e placa pa AZV tampoco. MinPres Mike Eman den su maneho Neoliberal ta yama e aumento BAZV dus placa ta bay directo pa nos cuido medico ya cu e no por acepta e logro di su contricante politico di 2007 esta Ex MinPres Nelson Oduber. Gobierno no ta pasa e placa pa AZV cu ta contra ley anto Parlamento no por actua pasobra nan partido tin mayoria. Si tawata na Hulanda Minister Angel Bermudez lo mester a entrega su retiró masha dia. Anto Minister Alex Schwengle pio defacto Bermudez tin cero (0) voto di pueblo anto Schwengle apenas 767 dus e mester ta den Parlamento y no den un posición di Minister. 

E transaction bancario di Koersmargevergoeding y Transfer levy tax cu no a wordo hinca bon den ley. Minister ta bisa Parlamento cu esaki ta wordo carga pa banco pero banco ta pasa esaki pa pueblo. Na caminda of mihor bisa den pipeline ta bin cu Transfer levy tax pa proyectonan PPP. Atrobe otro muestra cu nos Democracia ta Marginal. Gobierno di Mike Eman ta sigui suta pueblo cu Medida anto ta nenga di baha gasto. Nan ta sigui cu e fiestamento y viahamento cu placa di pueblo. Ni nan propio alarma di cas nan no kier paga.

Gobierno di Mike Eman no kier paga Schoolgeld, Serlimar, Azv, Svb, Siad pero kier sigui impone Medida riba pueblo. Ta entrega nos Autonomia Financiero pa sigui cu un maneho Facista. Mike Eman y su Gobierno no sa con pa crece economia, financias publico ta den un estado pesimo. A Goberna atraves di crea debe y mas debe cu clientelismo. Nan ta gasta Miyones na mercadeo pa tapa nan mal Gobernación. Nombracion politico ta na ordo di dia hasta arbeidscontractant ta pasa dilanti ambtenaar hamas bisto.

Nos di partido Movimiento Electoral di Pueblo lo sigui cu un oposicion al caso y democratico manera nos Constitución ta stipula. Nos líder Sra. Evelyn Wever Croes a propone varios Alternativa pa e Gobierno di Mike pa baha gasto pero MinPres Mike Eman ta prefera Medida y crea Pobresa na Aruba.

Expresionnan haci den e articulo aki no necesariamente ta refleha opinion di ArenaPoliti.co