Pueblo di Aruba, lo bo sinti bo mes orguyoso di mira e Prome Minister di bo pais presenta internacionalmente, pa relata logronan positivo y di admira di su gobierno pa bo país. Esaki mester ta e caso indudablemente. Pero, den caso di e Prome Minister di Aruba, kende a hiba palabra durante e Toronto Global Forum, como orador riba e temanan con a maneha retonan economico, energetico y social, como conciudadano Arubano, bo cara ta keda na berguensa! Dicon? Pasobra ta net riba e tres temanan aki, e Prome Minister su gobierno a faya barbaramente pa cu Aruba. Pa cuminsa, su gobierno a haya un “brevet van ondeugdelijk bestuur”. E maneho di su gobierno a percura pa Aruba a wordo downgraded financieramente di A- pa BBB-. Dicho bahamento den rating ta ser conclui door di instancianan financiero internacional. Niun di su gobierno su parameternan di nan presupuestonan anual di gobernacion a ser logra exitosamente. Semper tabata tin un presupuesto supletorio. E indice di e crecemento economico di Aruba, bow maneho di su gobierno, nunca a sali manera proyecta door di su gobierno! Bow di su gobierno e pais a keda cu un  (1) solo pilar economico. Bow di su gobernacion, e debe nacional a subi bay mas halto cu 80% di e pais su Producto Interno Bruto. Su pais Aruba, financieramente ta mas mal para cu Grecia, kende su situacion financiero ta di ta practicamente bancarota! Riba tereno energetico, ta un ridicules di marca mayor su echonan ta! Hinca placa den tur loke ta zona bunita y interesante pa su persona. Esaki manera un mucha cu ta kere tur storia. Causando cu e compania cu ta produci coriente y awa na Aruba, tambe ta hopi mal para financieramente. Aparentemente, WEB NV ta mas cu 20 miyon den rood na banco. Banconan NO kier fia WEB NV ni un (1) florin mas. Ningun momento su persona a bin padilanti bisa e pueblo cuanto placa e ideanan di sostenibilidad ta bay costa pueblo. E no sa y ni ta interes’e tampoco! Riba tereno social, na Aruba miseria a cuminsa manifesta su mes den un forma progresivo, sin indicacionnan contundente di cu e trend aki lo por baha tambe! Casnan sin coriente y awa, peticionnan pa ayudo den articulonan di prome necesidad na Departamento Social ta mas halto cu nunca. Desempleo den e area hotelero ta hopi halto. Medidadnan implementa riba e pueblo di Aruba, uno tras di otro y AINDA FALTA! Pa corona e obra di malgobernacion, hasta e Status Aparte di e pais, e Prome Minister a entrega bek den man di e pais colonialista. Firmando un protocol, den cual su persona deliberadamente ta otorga tur supervision na otronan. E parti mas malo den esaki ta, pa medio di poder y uzando menasa financiero contra su miembronan di Parlamento, dicho miembronan MES tin cu vota pa e ley cu ta kita nan propio poder di parlamentario.
Tin hopi mas echo cu por wordo menciona, pero pa falta di espacio esaki no por. Pa mi, Hulanda a manda sr. Eman bay Canada pa e por distrae su mes, p’asina Hulanda traha riba e ley di LAFT/CAFT/CFT sin cu sr. Eman interumpi. Esaki ta un situacion di win-win pa tanto Hulanda como sr. Eman. Pa Hulanda , pasobra nan ta tene sr. Eman contento haciendo show y pa sr. Eman, door cu e ta laga su parlamentarionan horca e pueblo y no e mes! Ohala e invitadonan por a lesa e rapportnan di IMF, Fitch Ratings y Standard & Poor’s relaciona cu e tres topiconan menciona mas ariba! Pero, pa ignorancia semper bo ta wordo tuma haci. DIOS spaar Aruba.

Expresionnan haci den e articulo aki no necesariamente ta refleha opinion di ArenaPoliti.co