Edificio ex cas di Gobernador a wordo entrega

Siman pasa a haci entrega di e proyecto di renobacion di e edificio conoci como ex cas di Gobernador, situa banda di lagoen na Oranjestad. Sr. Omar Tromp director di Felipe Construction y Sra. ing. Yvonne Webb-Kock, directora di Monumentenbureau a efectua e firmamento di entrega di e proyecto, tanto di e prome como e di dos fase di e renobacion di e proyecto di e ex cas di Gobernador.

E proyecto tabata un renobacion riguroso y ta consisti di tres fase. E prome fase ta encera renobacion di e edificio su exterior. E diseño tabata den man di Monumentenbureau, den persona di arkitecto Sra. Daphne Every cu e colaboracion di henter e departamento. Sra. Every alabes ta e diseñador di e hardin. E prome fase ta un proyecto di Gobierno di Aruba, di cual Gabinete Eman II a aloca un suma di Afls. 1.100.000,= riba su presupuesto pa esaki. E proyecto di renobacion di ex cas di Gobernador ta un iniciativa di Minister Presidente mr. Mike Eman y Minister di Infrastructura Sr. Benny Sevinger den cuadro di embeyecemento di nos centro di ciudad.

E di dos fase cu tambe a wordo entrega e siman tras di lomba y ta un proyecto di Kabinet di Gobernador di Aruba, cu ta encera e acabadonan di e parti interior di e edificio mas tur instalacion. Pa finalisa e di tres fase falta tur e mueblenan. Fase dos y tres ta wordo financia dor di Kabinet di Gobernador di Aruba.

Cu sosten di nos Minister di Cultura, Sr. Otmar Oduber, Monumentenbureau por a diseña y lidera e tres fasenan di e proyecto prestigioso aki. E mandatario ta contento cu e profesionalismo y amplio experiencia cu su departamento.

Intencion ta pa asina e proyecto finalisa e ta disponibel pa Gobernador di Aruba y Conseho di Minister, haci uzo di e edificio pa bishitanan diplomatico y tambe pa recepcionnan.

Directora di Monumentenbureau, Sra. ing. Yvonne Webb-Kock ta hopi contento cu e resultado final y ta comenta cu ta trata aki di un construccion cu ta di un caliber hopi halto.

E ekipo cu a traha, cu hopi dedicacion riba e proyecto fase I y II ta consisti di Monumentenbureau, Felipe Construction N.V, Rotec, Fantastic Garden, Protec, Safecom, Setar, Alno Eurokitchen, ASD, Banjoluz tur e suministradornan.

Un danki na un y tur cu a traha riba e edificio aki unda awor Aruba tin un hoya di un edificio.

Expresionnan haci den e articulo aki no necesariamente ta refleha opinion di ArenaPoliti.co