Minister Oduber a reuni cu e entidadnan pa frena transportacion publico ilegal 

Ya caba for di algun luna DTP den colaboracion cu Cuerpo Policial,  ta hopi activo riba nos careteranan pa combati e fenomeno creciente di taxi pirata.

Esaki a pone cu a dicidi di sinta cu huristanan pa delibera riba e leynan cu tin existente. Den un reunion cu Cuerpo Policial, Ministerio Publico y Aruba Airport Authority a delibera riba e actonan contra tur locual ta transporte publico na e momentonan aki cu ta tuma luga den un forma ilegal. E area di Aeropuerto ta e area cu mas a constata e tipo di actividadnan aki. Nan di nan banda tambe lo kier mira mas accion tuma luga pa frena e tendencia di taxi pirata.

Minister Oduber ta bisa: “Mi a mustra na e entidadnan presente cu e fenomeno aki ta inaceptabel. E ta un peliger grandi no solamente pa esunnan cu ta transporta pero tambe pa esunnan cu ta practica esaki contra e leynan di transporte publico y cu no tin e seguronan necesario.”

Actualmente personal di DTP no tin e autoridad pa eherce tur e tareanan di un Buitengewone Opsporings Ambtenaar, sin embargo nan por actua contra tur vehiculo cu tin di haber cu transporte publico, specialmente cu tin un sospecho cu nan ta actuando contra leynan di transporte publico. Awor e tareanan di e personal di DTP a wordo amplia unda lo por controla autonan cu tin A-nummerplaat cu den e caso aki ta sospechoso di ta actuando den un forma ilicito, ilegal of sin e permisonan necesario. “Polis naturalmente lo reenforsa esaki, esey ta e intencion, unda lo actua den un forma fuerte, a pesar cu ya caba esaki a inicia.” e mandatario ta comenta.

Sr. Oduber ta sigui bisa: “Polis recientemente a actua den un forma hopi fuerte, di cual mi kier gradici agente Vorst, cu ta e Rechercheur di bario di Playa cu ta cooperando tremendamente, tambe  na Korps Chef Dolfi Richardson, cu a pone su departamento disponibel pa atende cu e asunto aki, ya cu simplemente esaki no ta wordo tolera mas.” E Minister encarga cu transporte publico ta termina bisando: “Nos ta bay actua duro, nos ta bay actua contra tur esunnan cu ta transporta den un forma ilegal. Consecuencianan lo por ta te hasta  yega na e punto cu nan ta kita e vehiculo for di e chauffeur, y aresto di esunnan cu ta sigui cu e maneho ilicito aki. Aruba tin leynan tocante transporte publico y tin taxi pa transporta esunnan cu tin mester. Esunnan cu no tin permiso sigur lo por conta cu consecuencianan menos agradabel.”

Den e simannan nos dilanti lo por spera mas accion tuma luga. E caso unda a kita un auto y aresta e chauffeur tabata un inicio y consecuencia di trabounan haci pa frena e tendencia negativo di transporte ilegal. DTP hunto cu Cuerpo Policial y cu sosten di Ministerio Publico lo cuminsa actua di tal forma, cu si ta necesario lo cuminsa aresta e hendenan aki y tuma beslag di e autonan.

Expresionnan haci den e articulo aki no necesariamente ta refleha opinion di ArenaPoliti.co