Gabinete ME II: Avancenan ta pone aeropuerto riba e bon direccion pa bira e prome 100% sostenibel na mundo
Gabinete Mike Eman Eman II ta complaci di mira e avancenan grandi cu ta tumando luga na Aeropuerto International Reina Beatrix. Sin duda algun, e trabounan reciente di renobacion, expansion y mehoracion di e facilidadnan, ta promove e funcionamento ya excepcional di nos aeropuerto y ta garantisa cu tanto nos bishitantenan como nos mesun hendenan por disfruta di un experiencia di nivel optimo.
Minister Ing. Mike de Meza a hiba palabra ayera tardi durante e apertura di cuater di e prome proyectonan cu a keda cla, durante un ceremonia cu a tuma luga na sede di General Aviation den presencia Minister di Turismo y Transporte, Otmar Oduber, otro figuranan publico, invitadonan y prensa. Den su funcion di Vice President di Pais Aruba, e titular di Asuntonan Economico, Comunicacion, Energia y Medio Ambiente, a papia tambe den nomber di Minister President, kende no por tabata presente.
“Great job,” tabata e palabra cu a keda bin dilanti den e turno di Minister Ing. De Meza pa papia. El a felicita Directiva di Aruba Airport Authority N.V., pero tambe Aruba Tourism Authority y en particular colega Minister Oduber pa e trabou y esfuerso en conhunto. Esaki ta traduci den numbernan sumamente positivo pa e turismo di Aruba, pilar principal di economia di nos isla. E trabounan ta inclui e extension di e East Apron, extension di e apron di General Aviation, construccion di sala di espera B y reemplaso di luznan di pista pa luznan LED.
E titular di Energia a haci enfasis riba e desaroyonan tecnologico cu aeropuerto ta implementando manera e Solar Carport Park, e luznan LED riba e pista y den futuro tambe e uzo di Biofuel pa avionnan. Minister Ing. De Meza a bisa cu nos aeropuerto ta riba e bon caminda y tin chens pa bira e prome aeropuerto totalmente ‘green’ na mundo. “Esaki ta loke Gabinete Mike Eman I y II ta desea, pa lidera den e movemento sostenibel no solamente den e region, pero rond mundo.”
E mandatario no a keda sin duna un palabra grandi di danki tambe tur e companianan cu a forma parti di e proyectonan reciente na aeropuerto. “Tur hende ta duna un man y no ta yuda solamente aeropuerto, pero ta yuda henter Aruba,” Minister Ing. De Meza a bisa. E cuater proyectonan concreta tin un balor conhunto di 45 miyon Florin, tur ta ehecuta pa companianan local di construccion y ta apenas e promenan di un serie cu tin planea.avp
Expresionnan haci den e articulo aki no necesariamente ta refleha opinion di ArenaPoliti.co