Cu gran asombro, y principalemente cu indignacion, UPP a tuma nota di e entrevista cu a sali online di prome minister Mike E. cu Pax News.
Ta increibel pa constata con Mike E. deliberadamente ta sigui persisti cu mentiranan, cu tin como unico proposito pa crea e imagen eroneo riba e frente internacional di ta un estadista y innovador, y buscando reconocimento pa algo cu e no ta logrando den su propio cas Aruba.
Mike E. parce un hende cu ta cana den desierto, y unda cu e bay, e ta wak “fatamorgana”.
Ya cu na Aruba su credibilidad ta na filingrana, su focus den propagandá su "grandesa" a cambia, y awor e ta trata di uza e publicacionnan acumula den exterior pa tira santo den wowo di pueblo na Aruba cu cos ta bon aki.
Aruba ta na e rand di cay den un abismo financiero y economic, y Mike E. ta trata di bende un producto cu no ta existi, y un prueba palpabel di esaki a tuma lugar den e entrevista cu Pax News.

Den tur esaki nos ta culpa e miembronan di parlamento cu keto bay ta sigui sostene un minister president cu parce no ta bon di cabes. Algun luna atras UPP a haci un apelacion na Parlamento di Aruba, particularmente e 13 parlamentarionan di AVP, pa lanta for di soño y asina asumi nan responsabilidad pa para proyectonan descabeya cu ta sigui hinca nos pais, y hunto cu ne henter nos pueblo, den un abismo completo.
Nos a pidinan pa urgi na Mike E. y su gabinete pa nan tuma nan retiro, y asina duna espacio na un Gabinete di Emergencia of un Gabinete di Transicion.
Pero nos por ripara cu keto bay nan ta na soño, of ta sigui acepta e “narcismo” di Mike E.
Nos a bay e tempo ey asina leu di considera Mike E. “ontoerekeningsvatbaar”.
UPP ta di opinion cu e miembronan di parlamento sí ta “toerekeningsvatbaar”, pero pa probecho personal ta sigui sostene un gabinete cu ta cabando cu nos pais.
Mientras cu nos a caba di pasa den dos proyecto PPP cu ta sigui horca nos Pueblo mas y mas, nos por mira cu atrobe ta anuncia un PPP, esta e Ringweg, cu lo bay costa riba un 450 miyon florin, y atrobe pa un 20 aña.

Den e articulo riba internet di Pax News (The Little Island Thinking Big), banda di ta duna informacion eroneo, nos por destaca tambe expresionnan cu nos ta puntra si prome minister Mike E. ta bij.
Segun Mike E. e iniciativanan ambiental di su gobierno ta solamente un parti di un vision pa prosperidad sostenibel. E resultado di desaroyo sostenibel ta permiti tur ser humano alcansa nan necesidadnan basico, cu reconocimento di nan dignidad, y abundancia di oportunidad pa pursigui bida di satisfaccion y felicidad, tur esaki sin e risico di evita otronan di haci mescos tanto den presente como den futuro.
Esaki ta tipicamente un frase cu ta mustra cu Mike E. a perde tur “nocion di realidad”. E kier presenta su mes como un gran humanista, un gran salbador, pero e no ta realisa cu tur loke el a bin ta haciendo desde 2009, e ta depriva tanto e generacion di presente como esun di futuro, pa no ta ni hiba un bida di satifisfaccion ni tampoco cu felicidad. Mike E. ta chicando e generacion actual mas tanto posibel, mientras cu generacionnan di futuro ya caba ta mara na biyones di debe cu nan tin di percura pa paga. P’esey tambe e ta bisa cu el a hinca mas di 1 biyon dollar pa haci nos pais y pueblo feliz.
Ki tristo pa un prome minister bin bisa of gaba cu esaki, mientras cu e realidad ta cu e satisfaccion y felicidad lo ta cerca esnan cu ta rond di dje.
Tambe e ta bisa cu hopi destinacionnan turistico a perde bista riba e importancia di e calidad di bida di nan propio ciudadanonan. Tabata mas dirigi riba hotelnan cinco strea, pero sin un combinacion di un bon desaroyo socio-economico, esaki ta trece diferencianan.
E ta sigui bisa cu hopi di e destinacionnan aki ta bunita, pero nan ta cera den un cura grandi, pa evita e criminalidad of otro inseguridadnan molestia turistanan.
Cu e pensamento aki Mike E. ta haci comosifuera cu na Aruba sí ta wordo actua otro.
E maneho di su gabinete, hustamente den e ultimo añanan a haci e desekilibrio socio-economico mas grandi ainda. Mientras den e ultimo dianan aki nos por mira cuanto atraco, asalto y agresion tin, tambe contra nos bishitantenan.
Den e entrevista Mike E. ta sigui gaña cu turistanan por bishita nos sin ningun miedo of reserva.
E ta bisa tambe cu e nivel di servicio ta impresionante, ya cu esaki ta resultado di tin “happy people”, hende contento. Ki bofta mas grandi e no por duna na e clase trahador.
Cuanto problema nos por mira na Hotel RIU, unda cu ta trapando riba e derecho di e clase trahador.
Wak e intentonan di Paul C., yuda pa mediador di gobierno, pa para banda di empresarionan pa cambia ley laboral pa loke ta contratonan fiho.
Esaki ta ehempel di “happy people”? Prome minister Mike E. parce di ta biba riba un otro planeta, riba un otro isla cu yama Aruba.

Y asina e ta termina su entrevista bisando cu na Aruba ta trata di no solamente hotelnan 5 strea, sino di barionan, casnan di anciano, calidad di bida, cuido medico y enseñansa 5 strea. Tur ta bla bla bla pa gaba su mes, papia bunita, mientras e actonan ta contrario.
Y ainda nos no a bin riba e parti unda e ta lubida di bisa con e ta hincando Aruba den un debe astronomico, ta habita e pais aki cu hende di afor, mientras cu no tin suficiente pa esnan cu ta akinan, ta segregando nos comunidad di un banda y di otro banda ta creando e percepcion bou di pueblo cu nan mester ta mendigo di un gobierno, limosnero y dependiente di gobierno.

Palabra ta na e miembronan di parlamento cu ta sostene Mike E.
Pero speransa no tin mucho, mirando e calidad y nivel di esakinan.
Aruba Quo Vadis?


Den nomber di Union Patriotico Progresista – U.P.P.
Candelario A. S. D. Wever
Brazil, augustus 6 2015

Expresionnan haci den e articulo aki no necesariamente ta refleha opinion di ArenaPoliti.co