ORANJESTAD – Minister President Mike Eman hunto cu Pastor Rey Nares di parokia di Santa Cruz y Anthony Thiel di BIC N.V. a haci un bishita na e luga di trabou na Plenchi di Misa caminda ta haciendo un renobacion completo. Tur partido ta masha satisfecho con e proyecto ta progresando y ta entusiasma pa wak e resultado final cu lo haci un diferencia grandi pa e area aki y tur esnan cu ta haci uzo di dje.

Plenchi di Misa di Santa Cruz ta un parti masha importante di e bario ya cu e ta reuni Iglesia Inmaculada Concepcion, Santana Catolico, Centro Pastoral Aruba, Colegio San Hose y Maria School. Ta pa e motibo aki tambe cu Gabinete Mike Eman II a mira e necesidad di haci algo pa mehora e condicionnan cu pa añanan largo e plenchi tabata aden.

“E proyecto aki ta forma parti di e vision cu nos a desaroya pa mehora e calidad di bida den nos barionan. Nos ta drechando e circumstancia y infrastructura den nos barionan,” asina Premier Eman a comenta, añadiendo cu e trabounan ta kita hopi di e molesternan cu tabatin y trece mas bienestar. “Den combersacion cu Pastor y Parokia, a bin sali afo cu ta nan deseo pa haya un renobacion cu enfasis riba un infrastructura mas organisa y structura, pero tambe cu mata pa crea un ambiente positivo tambe pa e scolnan y tur rond di Misa di Santa Cruz,” e mandatario a splica.

Di su banda, Pastor Nares ta masha satisfecho cu e desaroyonan y hunto cu otro miembronan di e misa, ta contento cu e atencion ricibi. “Pa medio di oracion nos ta expresa nos alegria y gratitud pa nos gobernantenan y trahadonan envolvi den e trabou aki,” asina Pastor a bisa indicando cu esaki ta algo cu ta bon no solamente pa Santa Cruz, pero tambe pa otro barionan. “Nos ta mira e desaroyo hopi bunita pa progreso di henter Aruba. Mi ta kere cu Dios ta sigui bendiciona nos tur den e trabounan aki paso no ta djis pa algun hende so, pero pa henter pueblo di Aruba,” tabata e palabranan Pastoor Nares.

Director di BIC N.V., Anthony Thiel a splica cu e proyecto ta canando hopi bon. DOW y nan mes tabata habri y flexibel pa bin cu cambionan pa acomoda asina e deseo di no solamente e parokia, pero tambe scolnan rond. E plan ta inclui un total di 80 luga di parkeo cu ta cuminsa for di entrada di Misa te na canto di caminda. Tambe tin un sistema mas moderno y eficiente di luz publico pa brinda facilidad y siguridad, instalacion di bakinan di mata cu palonan cu ta bay crea un ambiente mas agradabel pa un y tur. “E ta bay bira un enfoke, un centro, e curason di e pueblo di Santa Cruz. E ta bay keda masha bunita,” segun Sr. Thiel.

Prome Minister Mike Eman a bisa cu e trabounan lo tuma mas o menos un luna pa keda cla. E siguiente proyecto di embeyecemento di bario riba programa di Gobierno ta tuma luga den Rancho. Esaki ta acopla na renobacion di centro di ciudad y waf di turista. Otro proyectonan andando y planea pa Santa Cruz ta inclui renobacion di Colegio San Antonio y edificio di MFA.

Expresionnan haci den e articulo aki no necesariamente ta refleha opinion di ArenaPoliti.co