ORANJESTAD - Dialuna y diamars hobennan di SVT ta dunando un man na e trabounan di limpieza y drechamento di edificio di Parlamento. E miembronan di e di 8 grupo di Formacion Social tambe a duna oido na e yamada haci dor di Prome Minister Mike Eman y President di Parlamento drs. Marisol Lopez-Tromp.

Hunto cu otro boluntarionan, a haci limpi den parti paden y pafo di Parlamento, piki piedra, boter y otro obhetonan cu a keda atras despues di e destruccion. Nan a duna sosten na esnan cu a reemplasa e glasnan kibra for di bentana y porta cu manifestantenan a kibra diahuebs ultimo. Tambe e grupo di hobennan a haci trabounan di preparacion pa verfmento di muraya, armando e stelagenan pa esaki. E proyecto di Formacion Social semper ta cla pa contribui na causanan social. Den pasado, SVT a yega di yuda den organisacion di Fiesta Rotaria, como tambe durante campaña di Aruba Doet.

E obhetivo, segun director di SVT, Jessy Ras, ta pa e hobennan haya un nocion y experiencia di loke trabou comunitario ta y con e ta beneficia pueblo pero tambe nan mes. Den e caso specifico aki di Parlamento, a demostra cu violencia no ta hiba na nada positivo y cu destruccion di propiedad publico ta afecta e propio pueblo. Hobennan di Formacion Social ta wordo educa den disciplina, respet, ofishi pa crea di e hobennan aki ciudadanonan ehemplar.

Prome Minister Mike Eman ta gradici enormemente e cooperacion duna dor di hobennan di SVT. E ta contento pa mira con e programa aki ta aporta na cosnan positivo na nos pais y ta dor di proyectonan asina aki Gobierno ta cambiando e futuro di Aruba.

Expresionnan haci den e articulo aki no necesariamente ta refleha opinion di ArenaPoliti.co