Pueblo a reacciona masal riba nan yamada 

ORANJESTAD - Den oranan tempran di dialuna mainta Presidente di Parlamento drs. Marisol Lopez-Tromp, Prome Minister mr. Mike Eman, demas miembronan di Parlamento di partido AVP y pueblo en general cu ta rechasa e destruccion feroz cu a tuma luga diahuebs ultimo riba e edificio di Parlamento a yega cerca pa yuda drecha e luga. Portanan kibra, un cantidad di bentana destrui, palonan di luz tira abou y asina por sigui. Parlamentarionan di AVP, Ministernan y pueblo di Aruba hunto cu empleadonan di DOW y otro departamentonan a cuminsa construi bek loke algun hende desespera a destrui.

Bou aplauso grandi di tur presente Prome Minister Eman a duna splicacion dicon a yega na e decision aki. El a bisa cu den fin di siman e hunto cu Presidente di Parlamento a reuni riba loke a sosode diahuebs y riba e dañonan haci na edificio di Parlamento. “Nos a dicidi di uni forsa caminda gobierno, parlamento conhuntamente cu comunidad ta bay haci un esfuerso pa pone Parlamento den e estado bek cu nos tur por ta orguyoso di dje.” Eman a corda tur hende cu na Aruba tabatin momentonan na unda diferencia di opinion tabata existi, pero hamas den historia di e baranca aki nos por a mira un man yen di hende haci destruccion asina grandi na cas di pueblo, Parlamento.

Eman, “Ora un aña pasa nos a para aki pa defende autonomia di pais Aruba, bay den welga di hamber pa despues bay Parlamento cu hopi emocion y a pidi pa manda un señal cla pa Reino Hulandes cu autonomia di Aruba ta algo sagrado, e fraccion den oposicion a haci mofa di locual nos tabata pidi. E tempo ey ningun momento e partidonan di oposicion a para pa defende nos autonomia manera debe ser. Al contrario, a tuma distancia y a bay Hulanda na hopi ocasion pa pidi Hulanda pa interveni. Pero, na momento cu nos a bin Parlamento siman pasa pa aproba un ley cu nos a splica den detaye, oposicion a haya ta bon pa malinforma pueblo y haci daño.” Hulanda tabata kier un CFT permanente y Aruba di su banda tabata kier su propio instituto cu ta controla su presupuesto cu ta garantisa cu Aruba ta cumpli cu e normanan internacional di bon gobernacion y finansas publico sostenibel. Hulanda no tabata kier esey y na final a yega na un acuerdo cu lo institui den Parlamento un organo cu lo tin relacion den contexto di Reino. Esaki lo ta temporalmente te ora tin un balanced budget na 2017/2018 y e ora ey ta institui Aruba su propio instituto di control, unda ta garantisa cu esaki ta algo autonomo. “Asina hunto nos ta percura pa pone e pais aki den e direccion positivo cu nos ta desea.”

Eman: “Ta haci dolor pa mira con hendenan cu no a para cu nos, no a lucha cu nos, no a sostene e mocion e tempo ey, a haci daño grandi na sala di Parlamento di Aruba. P’esey pueblo ta bin hunto awe pa duna Presidente di Parlamento un man hunto su coleganan, ministernan y demas boluntario pa yuda reestablece e bunitesa, honor y dignidad di nos sala di Parlamento cu ta e organo mas halto di nos pais. Di e forma aki mandando e mensahe cu nos ta orguyoso di pais Aruba y tur loke a logra desde Status Aparte. Nos ta stima nos pida baranca y nos no ta haci daño na nos pais. Nos ta mustra mundo cu nos ta un pais organisa di hendenan decente, unda tin respet y stimacion pa otro.”

Eman a sigura cu dentro di algun dia sala di Parlamento ta bek den e estado cu e tabata.

Expresionnan haci den e articulo aki no necesariamente ta refleha opinion di ArenaPoliti.co