Diahuebs awor pa 5:30 di atardi 

ORANJESTAD – Prome Minister Mike Eman y Presidente di Parlamento di Aruba, Sra. Marisol Lopez-Tromp diamars mainta a tene un conferencia di prensa cortico cu a tuma luga dilanti di Parlamento di Aruba. Prome cu a cuminsa cu su mensahe, Sra. Lopez-Tromp probecha e ocasion pa gradici tur boluntario cu a yuda cu drechamento di edificio di Parlamento di Aruba.

Sra. Lopez-Tromp a splica cu e edificio a keda destrui durante ultimo manifestacion y e ta masha agradecido na tur esnan “cu ta dunando nos un man pa drecha e edificio bek y e trabounan ta canando hopi bon tur e dianan aki. Danki na boso tur presente, danki pa e trabounan pa yuda e cas di pueblo bin bek den e forma cu e mester ta.”

Sra. Lopez-Tromp, “Nos kier haci un yamada na tur esnan den comunidad, nos pueblo en general, tur esnan di bon boluntad, pa bin cu nos, pa bin atardi diahuebs 5:30 pa asina nos tin un momento di, no solamente di e clausura di e trabounan, pero tambe un momento solemne pa nos refleha riba e union cu nos mester tin pa cu e trabounan cu mester sosode aki den Parlamento,” y Sra. Tromp a enfatisa cu tur esaki ta importante pa asina por “continua pa tene nos democracia bibo, den cas di pueblo manera cu mester ta.”

Prome Minister Mike Eman a uni su mes tambe na e yamada aki y sigui pa gradici Sra. Lopez-Tromp pa su liderazgo y durante momentonan hopi importante a duna guia na Parlamento di Aruba. Sr. Eman a sigui splica cu tur esaki a haci cu, “awe nos tur ta sinti nos mes inspira pa yuda pa yega e momento pa rededica, den forma di bisa, e sala di Parlamento na servicio di Pueblo.”

“Parlamento ta e instituto cu ta sirbi pueblo,“ Prome Minister di Aruba a enfatisa. Y Prome Minister ta bisa di ta orguyoso di por wak tur e parlamentarionan di fraccion di AVP y su colega ministernan dunando un man pa yuda drecha loke a wordo destrui algun dia atras.

“Orguyo di e Pueblo ta importante,” segun sr. Eman, “y pa nos ta un sentido grandi, pasobra ora cu nos nace nos ta wordo forma door di nos famianan, nos bisiñanan, nos docentenan y tur cu ta yuda y ta cultiva den bo curason un sentido di gratitud pa bo pais y bo nacion. Y awe nos por a haya e oportunidad pa rededica e amor aki na nos comunidad y hunto haci un diferencia pa nos comunidad.”

Expresionnan haci den e articulo aki no necesariamente ta refleha opinion di ArenaPoliti.co