Nos a tuma nota di e defensa di AVP su parlamentarionan y tambe di Minister Bermudez cu e ley di supervicion financiero di CFT no ta contene medida. Esaki ta otro mentira cu cual nan kier manipula y malinforma e Pueblo aki. E ley di CFT ta contene miyones na medida pa Pueblo.

Articulo 14 den cifras
E medidanan ta concentra den articulo 14 di e Ley di CFT cu ta contene e normanan den porcentahe pa locual ta e defict, e buraco den nos finanzas publico, cu nos Pais ta permiti pa por tin den 2015, 2016 y 2017. Pa 2018 a acorda cu nos Pais lo tin un deficit mas sino un surplus. A primera bista e porcentahenan aki no ta bisa mucho si bo no ta domina e materia dificil di finanzas publico. Ta ora bo traduci e porcentahenan aki den cifras, bo lo ripara ta di cuanto medida nos ta papia aki nan.

Mas di 210 miyon na medida
Pa 2015 ta premira un deficit di maximo 3,7% di nos GDP cual ta suma 185 miyon florin. Pa 2016 e deficit mester ta na 2% di nos GDP, cual ta suma 100 miyon florin y pa 2017 e deficit mester ta na 0,5%di nos GDP cual ta suma 25 miyon. Pa 2018 Gabinete Eman a acorda cu no lo tin un deficit mas sino un surplus di 0,5% di nos GDP cual ta suma 25 miyon. Awor pa bo bay di e 185 miyon di 2015 pa e 100 miyon di 2016, esey kiermeen cu Gabinete Eman mester tuma 85 miyon na medida. Di e 100 miyon di 2016 pa e 25 miyon di 2017, ta un otro 75 miyon na medida. Pa yega di un defict di 25 miyon di 2017 pa un surplus di 25 miyon na 2018, ta 50 miyon mester tuma na medida. Pues locual articulo 14 di e ley di CFT ta bisa nos ta cu Gabinete Eman ta bay tuma mas di 210 miyon florin di MEDIDA riba lomba di Pueblo pa por cumpli cu e ley aki.

Deficit di sector collectivo
Ta bon pa remarca cu den e porcentahenan di deficit tambe mester tene na cuenta e deficit di e companianan di e sector collectivo cu gobierno ta para garantia pa nan. Si acaso e companianan aki tin deficit, esey lo kiermeen cu Gabinete Eman lo mester bay tuma mas medida riba lomba di Pueblo pa por cumpli cu e normanan pa deficit stipula den articulo 14.

No por sigi gaña Pueblo
Awor teniendo na cuenta kiko e porcentahenan di articulo 14 di e ley di CFT ta bisabo den cifra, ta incomprondibel con nos Minister Bermudez y parlamentarionan di AVP por bisa cu e ley di CFT no ta contene medida. E ta condenabel cu despues cu e mal gobernacion di Gabinete Eman a hiba nos te na e extremo di bay bou curatela di Hulanda, ainda ministernan y parlamentarionan di AVP por tin cuero di cara pa sinta manipula y gaña nos Pueblo cu e ley di CFT no tin medida, siendo cu e ley di CFT ta contene mas di 210 miyon na medida pa Pueblo.

1 september 2015

Expresionnan haci den e articulo aki no necesariamente ta refleha opinion di ArenaPoliti.co