ORANJESTAD – Na final di e ceremonia solemn teni e siman aki pa entrega medaya di reconocemento postumo na famia di Michael Kip, Prome Minister Mike Eman a reflexiona riba e Arubiano aki su bida, su legado y e inspiracion cu e ta representa pa nos tur. “Michael Kip a entrega un parti importante di su bida na traha pa Nacionnan Uni na hopi pais y bou di circunstancianan dificil; entregando hopi di su bida y su oportunidad pa desaroya un carera propio pa dedica na yuda otro rond henter mundo,” asina e mandatario a remarca.

Nacionnan Uni tabatin hopi aprecio pa e trabou cu Michael Kip a eherce. E premio a yega Departamento di Relacionnan Exterior na 2005, e mesun aña di fayecimento di Kip. Pa un motibo of otro, el no a wordo entrega di biaha na famianan y keda tur e tempo aki warda.  Ora cu director nobo di e departamento, Sr. Edwin Abath a tuma nota di su existencia, inmediatamente a cuminsa prepara pa remedia e situacion. Asina a organisa un ceremonia cu a tuma luga den sala di presentacion di edificio Cocolishi.

E ceremonia, riba deseo di e famia, a conta cu presencia solamente di famia y amigo cerca. Di parti di Gobierno tabata presente hunto cu Premier Eman, Minister Benny Sevinger, Minister Otmar Oduber y Minister Angel Bermudez, como tambe ex colega di Michael Kip na Nacionnan Uni y actual miembro di Ministerio di Asuntonan General, Drs. Joyceline Croes.

‘Dag Hammarskjöld’  ta e nomber di e medaya di reconocemento. Secretario General a establece e reconocemento aki na december 2000 como un homenahe postumo  na miembronan di misionnan di paz cu a perde nan bida durante servicio cu un operacion di paz bou di e control operacional y autoridad di Nacionnan Uni.

E nomber di e premio ta basa riba e diplomatico, autor y economista Sueco, di mesun nomber, cu tabata e di dos Secretario General di Nacionnan Uni y a fayece den un accident di avion na 1961. E ta un di djis tres persona na mundo cu a yega di ricibi un premio Nobel di Paz di manera postumo.

Pa famia Kip tabata naturalmente un momento di emocionnan mixto den sentido cu e reconocemento ta duna nan hopi orguyo cu nan yiu, ruman, primo y familiar y amigo ta haya un reconocemento asina grandi di Nacionnan Uni, mientras cu di otro banda, e no tey pa e por comparti y disfruta di e momento importante aki cu nan.

Prome Minister Mike Eman a comenta cu e mensahe pa comunidad den esaki ta cu ora cu un yiu di tera tuma e reto pa bay sirbi mundo den e forma aki, nos ta mira con mundo ta responde tambe cu aprecio y reconocemento. Michael Kip no ta e unico Arubiano a cu a traha cu UN, Prome Minister a menciona, algun otro manera Sandra Marchena y Joyceline Croes kendenan tambe a desplega trabou rond mundo bou circunstancianan dificil.

“Ta importante cu den un persona su curason ta crece un sentido di responsabilidad pa e prohimo, den un pais e ta famia y bo comunidad. E ta bira ainda mas grandi ora bo ta mira personanan ta desaroya e sentimento di convivencia aki pa hendenan cu nan no ni conoce, toch nan ta sinti cu nan kier entrega pa e felicidad di e prohimo. Esey ta hopi importante den e formacion di nos hendenan, e sentido di convivencia y solidaridad por engrandece nos curason,” asina Prome Minister Mike Eman a expresa finalisando cu e pensamento cu “Un ehempel manera Michael ta insipira otro.”

Expresionnan haci den e articulo aki no necesariamente ta refleha opinion di ArenaPoliti.co