Manipulacion di Gabinete Eman ta sigui 

Un biaha mester constata con e ministernan di Gabinete Mike Eman a perde tur clase di gevoel y tur dia ta sigui trata di engaña y manipula mente di pueblo. Si no ta Mike Eman cu a gana premio mayor den su sin fin di gañamentonan, ta minister Otmar Oduber kende cu cara laba ta gaña cu ta su persona a introduci e busnan cu airco na Aruba y awor ta minister Paul Croes cu ta gaña y cu te hasta a yega asina leu cu e mester di un telraam Chines pa siña conta di nobo, di 1 te cu 10.

2910 – 2751 = 319?
E siman aki minister Paul Croes a emiti un comunicado den cual el’a declara cu na januari 2014 tabata tin 2910 persona cu ta cobra onderstand na Aruba y cu awe na oktober 2015 esaki a ser reduci te cu 2751 persona. Segun su persona esaki ta 319 persona menos cu ta cobrando un onderstand! Ta increibel e forma con e minister aki kier manipula mente di pueblo ya cu claramente por constata cu e cantidad aki nunca por ta un reduccion di 319, pero cu esaki ta solamente 159 persona!! Aki por a mira un biaha mas con e minister aki ta gaña, ta cuminsa conta robez y ta perde tur nocion di realidad.

Desempleo alarmante
Alavez ta bon pa remarca cu durante e ultimo 6 añanan e cantidad di personanan cu ta cobra onderstand a crece den forma espantoso y cu ta confirma cu e desempleo na Aruba a crece tambe den forma explosivo y cu e desempleadonan obligatoriamente mester a recori na cobra onderstand. Si na 2009 Gabinete Oduber a laga e cantidad di personanan cu ta cobra onderstand na 1846, den apenas 5 aña, esaki a crece te na un record di 2910 na 2013 y 2751 na 2015. Sinembargo tur dia bo ta haya e politiconan di AVP, entre otro Rene Herde ta manipula informacion bisando cu desempleo a ser reduci for di 11% te cu 7%, siendo cu entre otro e cifranan di e cobradonan di onderstand ta papia pa nan mes. Realidad ta cu bao di Gabinete Mike Eman desempleo na Aruba a kibra tur record den e ultimo decadanan!

Expresionnan haci den e articulo aki no necesariamente ta refleha opinion di ArenaPoliti.co