Parlamentario Kelly tabata presente na e “Green Conference” cu a tuma luga e siman aki y ta califica e tema cu a wordo trata como uno sumamente interesante, mirando e beneficionan significante cu esaki lo por crea pa nos comunidad.

E conferencia

Durante e conferencia varios experto y ehecutivonan di diferente compania di utilidad a adresa e tema aki y duna nan punto di bista tocante e beneficionan cu energia alternativo ta brinda. Importante ta pa keda informa henter comunidad di e embergadura di e vision 2020, mirando cu mundialmente tin un interes grandi pa e tema aki. Aruba siendo un isla chikito tin un vision pa cu esaki y Gobierno di Aruba a percura pa strategicamente forma un aliansa cu diferente gruponan cu ta experto riba e tema, manera Carbon War Room, Rocky Mountain Institute y Clinton Global Initiative. Esaki ta habri porta pa asina nos profesionalnan por intercambia y expande nan conocemento pa yuda cumpli cu vision di Gobierno di Aruba pa hasi Aruba un pais completamente sostenibel riba tereno di energia (Vision 2020).

Proyectonan

Si nos tene na cuenta e recursonan cu Aruba tin cu ta biento fuerte, solo na abundancia y olanan grandi, nos mester hasi uso di nos fuentenan natural y usa esakinan na un manera mas eficiente y sostenibel posibel. Aruba por fungi como ehempel pa otro paisnan na mundo y siguramente den Caribe pa loke ta trata vision riba energia sostenibel. Kelly ta splica cu tin hotel ta hasiendo uso caba di olanan grandi di lama pa fria nan airconan. Ademas por mira proyectonan manera e panelnan solar dilanti di aeropuerto, e parke di Molina di biento na Vaderpiet y e planta Eco Gas di “waste to energy”.

Gobierno ta preparando pa facilita nan edificionan cu panelnan solar. Segun Parlamentario Kelly a compronde, MFA Noord lo ta e prome edificio di Gobierno cu su energia lo wordo 100 por ciento genera pa panelnan solar.

Algun siman pasa Scol Primario Kudawecha a conoce inicio di loke ta instalacion di panelnan solar na scolnan. Esaki ta forma parti di e proyecto di instalacion di panelnan solar riba 40 scol aki na Aruba. E siguiente scol cu ta bin na remarca lo ta Filomena College Mavo na San Nicolas. E tipo di proyectonan aki a lo largo lo percura pa un stabilidad cu na final por conduci na reduccion di prijs di coriente.

Parlamentario Kelly ta aplaudi e atencion cu Gobierno di Aruba ta dunando nos scolnan pa loke ta trata energia sostenibel y ta enfatisa cu ta importante pa inculca den nos muchanan desde chikito caba e conscientisacion y educacion tocante sosteniblidad, energia renobabel y cuido di nos medio ambiente.

Expresionnan haci den e articulo aki no necesariamente ta refleha opinion di ArenaPoliti.co