Mester involucra hobennan pa nan hiba nos na e siguiente fase. 

ORANJESTAD – Minister Ing. Mike de Meza tabata masha contento di por ta forma parti y ta presente na inicio di e trabounan di instalacion di panelnan solar riba dak di Abraham de Veer School na San Nicolas. Ademas di ta e prome scol pariba di brug cu ta aporta na e produccion nacional di energia limpi, e titular di Energia ta combenci cu e proyecto aki lo sirbi pa e “muchanan mira kico ta nifica energia alternativo; cu e no ta un storia, pero ta funciona en berdad.”

Minister de Meza a declara e mainta dilanti di colega Minister President Mike Eman, representantenan di companianan di utilidad, directiva di e scol y prensa cu ta dor di tin proyectonan manera panel solar na scol, e parti di educacion ta beneficia de mas di un forma. A keda anuncia durante e ceremonia aki cu e scol ta bay ricibi un suma di placa a cambio di e energia cu ta wordo produci den nan planta. E recursonan aki ta bay den un fondo cu ta beneficio e propio scol.

Otro manera ta dor di laga e hobennan tin un presencia y acceso mas grandi na e tecnologia. Algo cu por inspira nan pa sigui den e tereno aki. “Nos mester involucra nan y mustra nan dicon esaki ta importante pa nos medio ambiente. Nos a pasa e peak, pero e hobennan ta biniendo y ta nan tin cu hiba nos na e siguiente fase,” e titular di Energia a comenta.

Minister Ing. de Meza ta di opinion cu e desaster di mas grandi ta si nos no haci e cambionan awo. Por bin cu tur sorto di excusa, pero si nos no haci nada, ki sorto di mundo nos ta creando pa mañan. “Mi ta contento paso San Nicolas ta haya e imagen di ta tereno fertil pa produccion di energia berde pa medio di e panelnan solar na Abraham de Veer School, e Parke di Molina di Biento y e Parke Solar cu na e momentonan aki ta trahando riba dje pa bin na Lago Heights y lo produci 5 mil Kilowatt.”

Por ultimo e mandatario a felicita Abraham de Veer, a gradici gerencia di WEB ARUBA N.V. como tambe e compania local Retraco pa e trabounan haci riba e tereno. A elogia Utilities Aruba N.V. pa e esfuerzonan y na Minister President Eman cu semper ta para tras di e proyectonan aki.

Expresionnan haci den e articulo aki no necesariamente ta refleha opinion di ArenaPoliti.co