Na inicio di proyecto di panel solar na Abraham de Veer School. 

ORANJESTAD – Otro momento di satisfaccion y felicidad tabata sigur pa Prome Minister Mike Eman diabierna mainta ora cu e mandatario a forma parti di e ceremonia cu a duna inicio na e trabounan di instalacion di panelnan solar riba dak di Abraham de Veer School na San Nicolas. El a felicita e directiva y alumnonan di e scol, como tambe tur otro cu a haci e avancenan den vision pa un pais sostenibel bira realidad cu cada stap. 

Premier Eman a gradici na prome luga su colega den Gabinete di Gobierno, Minister Michelle Hooyboer-Winklaar, kende como titular di Enseñansa ta brinda su apoyo y sosten grandi na e idea di pone panel solar riba dak di scolnan mescos cu otro entidadnan den e sector. “Tanto Dienst Publieke Scholen como SKOA y SMOA ta cooperando paso nan ta kere den e proyecto y sigur bou di e condicionnan faborabel cu ta comparti e produccion di energia cu e propio scol pa nan por mira e beneficio di esaki.”

Prome Minister a recorda esnan presente cu su Gobierno por tin e vision, pero mester traduci e vision ey den practica. Afortunadamente e ta conta cu un Minister di Energia cu ta kere y ta comprometi cu e causa. Tambe Director di Utilities N.V., gerencianan di WEB Aruba N.V. y ELMAR Aruba N.V. cu ta traha den ekipo. “Hunto boso ta dunando un empuhe hopi grandi na un vision importante.”

E mandatario a bisa cu pais Aruba por ta orguyoso di otro 214 Kilowatt cu pronto lo ta riba e red nacional. “Di e manera aki nos ta yega mas cerca di e 100% di sostenibilidad cu nos a pone nos dianti pa 2020.”

Premier Eman ta kere cu e proyecto lo sirbi tambe como un fuente di inspiracion pa e hobennan cu ta atende scol secundario na San Nicolas. Interes por lanta pa un estudio y carera den area di ingeniera, ciencia of sostenibilidad, entre otro.

Tambe Minister President ta spera cu e fondonan cu e ta bay produci por wordo uza maximalmente pa educacion y formacion di nos hobennan den e area aki y otro areanan tambe. Segun e acuerdo cu scol, WEB Aruba N.V. ta bay duna un suma bek pa e produccion di energia cu ta ekivalente na un 15 mil Florin pa aña. Esaki ta bay den un fondo destina pa e propio scol.

Expresionnan haci den e articulo aki no necesariamente ta refleha opinion di ArenaPoliti.co