Banco Central ta mantene e deficit di 2015 na 201,7 miyon florin. 

Recientemente Banco Central a publica su Annual Statistical Digest di 2015 riba nan website www.cbaruba.org. Den e publicacion aki nos por haya informacion di entre otro con Gobierno su finanzas publico tabata na aña 2015. Segun Banco Central e buraco den nos finanzas publico, e deficit pa 2015, ta keda na 201,7 miyon. Banco ta mantene e deficit aki y asina keto bay ta keda un diferencia grandi cu e 98,1 miyon cu Minister Bermudez ta presenta como deficit pa 2015. E diferencia grandi aki ta trece confusion y pesey ta ora pa Banco Central hunto cu Minister Bermudez splica e diferencia grandi den deficit pa 2015. 

Banco Central mester duna conferencia di prensa
Tur instancia cu ta hunga un rol di checks and balances na nos Pais tin e obligacion moral pa duna informacion na e Pueblo riba e situacion real di nos Pais. Sigur awor cu Aruba ta bou di supervicion financiero di CFT, Pueblo ta haya falta di scucha for di Banco Central mes con nos Pais ta para na man di Gabinete Eman. Esaki no ta algo nobo, ya cu tempo di Gabinete Oduber bo tabata haya conferencia di prensa di Banco Central y hasta tabata tin conferencia di prensa na unda e Minister di Finanzas hunto cu ehecutivonan di Banco Central tabata brinda informacion na Pueblo. Hustamente awor cu nos Pais ta bou supervicion financiero, Banco Central no por permiti su mes e luho di keda sin duna splicacion na Pueblo den un conferencia di prensa. Awor mes cu Banco Central ta publica un deficit dobbel mas grandi cu Gobierno, ta net un bon momento pa Banco Central hunto cu Minister Bermudez splica e diferencia grandi aki den un conferencia di prensa pa asina e diferencia aki ‘once and for all’ keda clarifica.

Splicacion pa Pueblo por compronde
Den e Annual Statistical Digest 2015, Banco Central a purba splica e diferencia dunando tres motibo pa e diferencia. Tin retraso den pago di gastonan cu Gabinete Eman no a paga den 2015. Tin un diferencia di e momento (timing) y comptabilidad (accounting) entre Banco Central cu Gobierno cu ta resulta den cifra diferente y tin transaccionan di Fondo Desaroyo Arubano (FDA) cu Banco Central ta tene cuenta cune y cu Gobierno no ta tene cuenta cune ora di publica cifra. Pero e splicacion duna aki pa Banco Central no ta suficiente pa Pueblo por compronde kiko ta pone cu tin un diferencia asina grandi den cifra di deficit. Por ehempel si Banco Central ta indica cu tin retraso den pago di gasto, anto un hende mester splica Pueblo ta cual gastonan esaki ta. Y aki ta unda cu Banco Central hunto cu Minister Bermudez den un conferencia di prensa por duna un splicacion pa Pueblo compronde dicon tin un diferencia asina grandi den cifra di deficit pa 2015.


10 juli 2016

Expresionnan haci den e articulo aki no necesariamente ta refleha opinion di ArenaPoliti.co