Den un entrevista, Parlamentario pa partido MEP, sr. Guillfred Besaril, a elabora riba e caso den corte entama recientemente pa RBM Estates. Sr. Besaril a declara lo siguiente: 

"Recientemente nos por a tuma nota di e caso entama pa RBM Estates contra Gobierno di Aruba. E caso tabata tin di haber cu un proyecto pa desaroya e tereno cu a wordo rosa den e vecindario directo di Bubali Plas. E caso riba su mes a hala poco atencion den nos comunidad. Loke cu a termina ta hala masha hopi atencion, ta e postura y declaracion di Minister Sevinger riba e caso. 

Con por ta posibel cu un persona cu a bay representa un Pais den un cumbre Internacional asina importante manera esun di COP21 na Paris por expresa su mes di e forma cu señor Sevinger a expresa su mes den prensa? Con por ta posibel cu den e vision di e Minister, Pais Aruba tin suficiente zona berde? Con por ta posibel cu un Minister por sali declara cu e ta contra di un maneho cu t’ey pa salvaguardia e naturalesa di Aruba?

Pa esnan cu ta haci nan mes e pregunta kico COP21 ta encera exactamente, mi ta probecha na splica cu ta trata di un cumbre cu tin como tema principal e cambio climatologico Mundial. Calentamento Mundial (Global Warming) ta e fenomeno principal di preocupacion cu ta afecta nos "Mama Tera". Tur experto y scientifico sa cu mas "Berde", pues mas flora, ta imperativo pa combati e fenomeno di "Global Warming". Ta pa es motibo aki nos fraccion no por caba di compronde Minister Sevinger! E mandatario en cuestion ta bula bay Paris y bati man pa loco p'e resolucion final di e COP21, pa despues yega su Pais y fulmina contra e resultado positivo di e proyecto na Bubali Plas cu exactamente ta contribui na un mundo mihor! Ta sr. Sevinger mes a tuma tur su tempo pa splica prensa con bon e resultado tabata di e proyecto di WEB na Bubali Plas. Pues un balor agrega na nos flora y fauna, pa despues bira sorprende tur hende na bisa c'un gobierno di otro signatura (MEP) no por dicidi riba e futuro y maneho di un otro gobierno (AVP) pa loke t'e Ruimtelijk Ontwikkelings Plan (ROP)! Den mi humilde opinion, si Bubali Plas su flora y fauna a desaroya positivamente, e mester ta un fuente di orguyo y no un motibo di disgusto!

E minister ta duna nos fraccion hopi di pensa cu su expresionnan eratico. Kisas e kier cambia un regulacion manera esun di ROP actual puro na beneficio personal? Ken ta sali gana cu e proyecto band'i Bubali plas? Solamente e desaroyadornan RBM Estates of un "cuenta bancario" misterioso? Dicon tanto euforia na Francia, tanto amor pa "Mama Tera", pero na Aruba ta defende interesnan comercial? Di berdad nos fraccion ta di opinion cu na beneficio di integridad gubernamental, sr. Sevinger MESTER wordo investiga lo antes posibel pa Ministerio Publico!", Parlamentario Besaril a termina.

Expresionnan haci den e articulo aki no necesariamente ta refleha opinion di ArenaPoliti.co