Diamars anochi pa 9:40 na Telearuba lo cuminsa un programa unico na Aruba, “Cara-Cara”. Ta trata aki di un programa di Minister Otmar Oduber cu lo sinta dos biaha pa luna cu e periodista independiente di ablief.com, Dilma Arends.
Intencion di e programa aki di 15 minuut ta pa Minister Oduber contesta tur pregunta realiza pa Dilma Arends na un forma habri y directo, treciendo tur e claridad dilanti pa cual e mandatario ta para pe.
Mester bisa cu e concentracion lo ta riba e careteranan di Minister Oduber (Turismo, Transporte, Sector Primario y Cultura), pero e mandatario lo contesta tur pregunta cu Sra Arends lo por bin cune riba gobernacion en general y otronan.
E prome programa lo tuma lugar diamars 17 di november pa 9:40 p.m. na Telearuba y despues di esaki lo habri tambe un Facebook Page di Cara-Cara unda tur hende lo por sigui e programa parti den diferente segmento y tambe lo por bin cu pregunta pa e mandatarionan cualnan lo wordo haci dor di Dilma Arends durante e siguiente programanan.
Di e manera aki e mandatario kier presenta tur e informacion di su ministerionan pa medio di un programa cu un periodista cu ta conoci pa ta hopi skerpi y al caso cu su preguntanan.

Expresionnan haci den e articulo aki no necesariamente ta refleha opinion di ArenaPoliti.co