Banco Central a inventarisa e situacion na 2009 y awe e cambio ta sumamente grandi 

ORANJESTAD - Prome Miniser Mike Eman, durante di encuentro cu prensa dialuna ultimo, pa duna mas informacion riba e acuerdo sumamente importante pa Pais Aruba. Sr. Eman a cuminsa pa felicita Minister di Economia, Comunicacion, Energia y Medio Ambiente, ing. Mike de Meza y e team negociado cu a traha duro y largo pa por yega na e acuerdo aki. Pero Prome Minister a bisa cu ta importante tambe pa wak loke a logra awe y unda Aruba tabata tempo cu a cuminsa cu e prome Gabinete cu ta hiba su nomber.

Como Prome Minister, mr. Mike Eman a cuminsa su trabounan prome di november 2009 y pa final di e aña ey Banco Central a publica nan 'Annual Statement', dunando un inventarisacion di e situacion economico y financiero e aña ey. Prome Minister ta corda cu na final di e 'Annual Statement', den e ultimo paragraf, presidente di Banco Central sra. Jane Semeleer, a bisa, "unicamente na momento cu tin un solucion pa e refineria cera cu nos tabata tin, pa e caida den turismo cu nos tabata experenciando na 2009, pa e fondonan di pensioen di AOV y esun di APFA, pa e situacion di e peso cu AZV tabata nifica riba e presupuesto di Pais Aruba, e deficitnan grandi cu Aruba tabata tin y e perspectiva economico pa Aruba den liñanan mas grandi, por resolve e situacion cu Aruba tabata aden e tempo aya" Prome Minister Eman a recorda.

Prome Minister Eman a splica cu for di e tempo ey, el a considera conclusionnan di sra. Semeleer como un 'nullpunt' of punto di comienso di su Gabinete. "Para akinan awe, e ta duna'mi un satisfaccion hopi grandi y pesey palabranan adicional di gratitud y di elogio tambe pa e trabou cu a wordo haci. Si bo repasa e lista aki, cu Banco Central a bisa cu ta e temanan central cu tabata colga y tene e futuro di Pais Aruba, cu tabata un peso y scuridad, pa nos sa si nos ta bay tin un perspectiva pa futuro, uno pa uno e temanan a wordo atendi cu ne y a wordo resolvi! Nos turismo, di su caida pa su crecemento, tanto den volumen como den e cantidad di capital cu cada turista ta laga atras Aruba, a bay creciendo enormemente."

Sr. Eman ta splica cu a reforma e fondo di pensioen di AOV cu tabata coriendo den cifranan cora, awe ta stabiel y cu ta garantisa e pensioen di tur nos grandinan. "E fondo di pensioen di APFA cu tambe a wordo menciona door di e presidente di Banco Central di Aruba, tabata colga tambe como un peso hopi pisa na e presupuesto di Pais Aruba. Nos a reforma y resolve esaki. E fondo di seguro medico AZV, cu nos a mira den añanan anterior tabata pidi un 'lands bijdrage', un aporte di gobierno entre 100, 120 pa 130 miyon florin, awe e aporte cu gobierno mester duna despues di tur e reformanan cu nos a haci, cu nos a crea BAZV, ta core entre 40 cu 50 miyon florin, a reduci esaki drasticamente cu mas di 100 miyon florin."

"Si nos mira e desaroyo economico cu nos a crea," Minister Eman a enfatisa, "cu inversionnan den renobacion di nos centronan di ciudad, renobacion di nos barionan, renobacion di scolnan, e sistema di yuda esnan di entradanan menor den nos pais, cu un aumento di bijstand, cu un schoolkinderen toeslag, cu un reparatietoeslag, bo ta mira cu e vision y e politica di trece Aruba den un desaroyo sostenibel a traha. El a traha asina bon cu awe e resultado ta hasta cu un S&P ta hisa Aruba su 'outlook' for di 'stable' pa un 'positive outlook'. Nos ta mira tambe cu Cft ta bisa cu Aruba ta alcansando e normanan cu tin poni pa e presupuesto y S&P tambe ta bisa cu nan ta mira cu Aruba ta bay ta den e posicion pa por alcansa e normanan e aña aki y otro aña tambe. Tur esaki naturalmente ta un cambio dramatico, drastico, for di un situacion sumamente negativo cu nos a haya Pais Aruba na 2009."

Apertura di e refineria, un di e puntonan di importancia grandi pa economia y finansas di Aruba, cu Banco Central a mustra cu mester haya solucion pe, tambe ta wordo resolvi. E situacion cu Gabinete Mike Eman I a haya na 2009 tabata un di e situacionnan di mas malo den historia di Aruba. Cu retonan grandi y cu awe cu perseverancia y profesionalismo a keda resolvi.

Expresionnan haci den e articulo aki no necesariamente ta refleha opinion di ArenaPoliti.co