Locual a pasa den Parlamento di Aruba na unda cu Parlamentarionan di AVP a agredi otro ta un problema cu merece atencion. Sigur ora cu ta trata agrecion contra e Presidente di Parlamento y riba dje un hende muher, e caso aki merece atencion. E prome yama pa duna atencion na esaki ta nos Minister President Eman, kende aparte di ta lidera nos Pais, ta lidera e partido di cual e parlamentarionan encuestion ta forma parti. Pero awor cu e Presidente di Parlamento a declara su mes independiente den Parlamento alehando su mes di partido AVP, a bira conoci cu Minister Eman lamentablemente no a atende cu e caso di abuso aki debidamente. Di e manera aki Minister Eman como lider di nos Pais a faya barabamente den consenti agrecion den su partido y brinda mal ehempel na nos comunidad.

E stul pa Hulanda ta mas importante
Locual a pasa den Sala di Parlamento ta nada mas cu e falta di liderasgo cu ta ser senti na full nos Pais. No ta pornada cu desde 2013 nos ta cuestionando Minister Eman su ausencia den gobernacion di nos Pais. E biahenan constante di Minister Eman pa haci trabou di loopjongen pa Hulanda por haya un stul den e Comicion di Seguridad di Nacionnan Uni, a resulta den caos na nos Pais. No tin decicion ta wordo tuma, Gabinete Eman ta foi control cu rancamento di cabey constante entre ministernan y awor a culmina den agrecion den Parlamento. Ta bisto un biaha mas cu pa Minister Eman e stul pa Hulanda mas importante cu goberna nos Pais of atende cu agrecion den su partido cu ta pone cara di nos Pais na berguensa.

Poco balor pa hende muher
E ta sigur tristo pa mira cu nos Prome Minister Eman den e caso aki a duna poco balor na locual a pasa cu un politico femenino den su partido cu un pocicion asina importante pa nos Pais manera esun di Presidente di Parlamento. Minister Eman a mustra cu e tin poco balor pa hende muher den politica. Pasobra si berdaderamente e ta duna balor, elo a sa di atende debidamente cu e caso aki y no a laga malcontento den partido escala te na e nivel di agrecion contra colega y pior ainda agrecion contra un hende muher.

Eman a faya barabaramente
Den e caso di agrecion den Parlamento, Minister Eman a faya como Minister President, como Lider di Partido, como colega y como hende. Pasobra bo por tin diferencia di opinion, pero esaki no ta hustifica cu bo ta laba man y laga bo coleganan di partido hala otro cu mokete. Y pior si ta trata agrecion contra hende muher. Un mal ehempel a wordo demostra aki pa Minister Eman. Ta di spera cu su otro coleganan specialmente esnan femenino distancia nan mes di e mal ehempel di Minister Eman pa consenti agrecion den su partido. Sino mayan ta nan lo come golpi den AVP y Eman lo laga nan cay tambe.

14 juni 2016

Expresionnan haci den e articulo aki no necesariamente ta refleha opinion di ArenaPoliti.co