STA. CRUZ – Presupuesto 2017 a wordo califica pa CAFT y pa Raad van Advies como uno irealistico y den cual gobierno mester bin cu hopi cambio prome cu e por wordo aproba. Raad van Advies a duna un conseho hopi negativo riba e Begroting 2017, y CAFT tambe a expresa su preocupacion den su conseho.

Den e presupuesto por nota un biaha mas cu e decision di Mike Eman pa bai pa 9 minister, ta devastador pa nos presupuesto.
Riba e grafico adhunto bo ta mira e gastonan average
Y por conclui cu si compara e gobierno di MEP, su gastonan pa 7 minister tabata 30 miyon florin. E prome periodo di gabinete Mike Eman ya caba e gastonan a subi ten a 42 miyon florin. E di dos periodo, cu 2 minister EXTRA e gastonan a bolbe subi, ten a 46 miyon florin.
Aki por mira con hopi gasto 9 minister di AVP ta costa pais Aruba, 46 miyon florin, mientras cu 7 minister di MEP a costa Aruba 30 miyon florin. Kiermeen cu e 9 ministernan di Gabinete Mike Eman ta costando Aruba cada anja 16 miyon florin extra, compara cu gobierno di MEP na anja 2009. E ministernan den gabinete Mike Eman den 8 anja a gasta 100 miyon mas cu e ministernan di gobierno di MEP. E tipo di abusonan aki tin Aruba na borde di bancarota.

SOLUCION DI MEP
MEP ta kere den un gobierno mas eficiente, cu menos minister, coordinador, y gastonan di luho. Nos ta propone 3 paso: Paso 1: bai di 9 pa 7 minister, Paso 2: baha cantidad di coordinador, Paso 3 baha gasto di luho di gobierno, y asina scapa 50 miyon florin.
Cu e 50 miyon aki nos por combati criminalidad y hasi Aruba mas sigur. Nos por percura cu abusadornan sexual ta wordo persigi y haya castigonan halto. Nos por mehora nos cuido di salud cu ta cabando cu nos hendenan, y nos por inverti e placa den ensenjansa, pa hasi’e studiamento mas interesante y atractivo pa nos muchanan. Ami ta kere firmemente, cu eynan e prioridad mester ta, y no na tanto gasto di luho ma e ministernan. 

Expresionnan haci den e articulo aki no necesariamente ta refleha opinion di ArenaPoliti.co