Den su rapport di investigacion riba e Cuenta Anual di Pais Aruba pa 2015, Controlaria General (ARA) a expone e fiesta di nombracion politico di coordinadornan a diferente buro di Ministernan. Di e 328 persona cu ta traha hunto cu e Ministernan di Gabinete Eman, 230 ta politicamente nombra.

No tin screening
Riba pagina 21 di e rapport di ARA por lesa cu investigacion ta mustra cu e Departamento di Recurso Humano (DRH) di Pais Aruba no tabata envolvi den e maneho di personal di Gobierno. Tur maneho ta wordo traha na buro di Minister Bermudez. Banda di esaki ARA ta constata cu DRH no tabata ningun rol ora cu Gobierno ta tuma hende riba contract (arbeidscontractant) pa traha den servicio di Gobierno na e buronan di e Ministernan. E arbeidscontractantnan aki no ta pasa ningun screening di DRH.  Nan no ta wordo evalua pa sa si nan por asumi e funcion, ningun hende a evalua si nan merece e salario cu nan ta cobra y ningun hende sa si nan tin derecho pa goza di e beneficionan cu nan ta haya. E 230 arbeidscontractant cu no a pasa ningun screening of evaluacion di DRH ta simplemente politicamente nombra.

Discrepancia grandi
ARA a remarca tambe cu tin un discrepancia grandi den e cantidad di personal cu ta traha cu e Ministernan. Nan ta usa como ehempel e buro di Minister Eman cu ta consisti di 111 persona, siendo cu e buro di Minister Dowers ta consisti di solamente 10 trahador. E discrepancia aki ta demasiado grandi y no tin un logica cune. Pasobra ki necesidad Minister Eman tin pa rondona su mes cu 111 trahador, siendo cu ta Minister Bermudez ta esun cu tin e tarea pisa di sanea e finanzas publico di nos Pais cu solamente 10 persona?

Fiesta cu arbeidscontractant
Durante e reunion pa trata e Ministerio di Finanzas y Organisacion, nos a presenta Minister Bermudez cu e investigacion di ARA y a puntra e mandatario con por ta posibel cu tin tanto arbeidscontractant ta traha cu e Ministernan sin cu nan a pasa ningun clase di screening di DRH. Minister Bermudez a indica cu no tin un organisacion oficial (formele formatie) di e personal cu ta traha na e buro di Ministernan y pa awor cada Minister ta dicidi ta cuanto hende e ta tuma pa traha como arbeidscontractant cune. Cu otro palabra, tin un fiesta cu arbeidscontractant na e buro di Ministernan di cual Minister Eman ta ‘span de kroon’ cu 111 persona.

Nombracion politico
E investigacion di ARA ta expone e fiesta di arbeidscontractant na e buro di e Ministernan y ta prueba con Minister Eman y su bende ta practica patronahe politico usando fondo publico schaars pa nombra 230 persona na un manera politicamente. Tur hende tin derecho riba un trabou, pero no por nombra hende djies pa nan color politico. Tur hende cu ta traha na Gobierno y na buro di Ministernan mester pasa e evaluacion di DRH na un manera igual. Nombracion politico mester wordo para, pasobra e ta perhudica y frustra tur otro empleado publico cu ta inverti honradamente den nan estudio, preparacion y experiencia.

9 november 2016

Expresionnan haci den e articulo aki no necesariamente ta refleha opinion di ArenaPoliti.co