Mientras ta cubriendo gastonan structural cu entradanan incidental     

Otmar Oduber lider di e plataforma politico POR ta di opinion cu gobierno mester ta sincero cu pueblo y bisa con lo cubri deficit di presupuesto na un manera structural. Mientrastanto tin presupuesto 2017 cu ta mustra bunita sinembargo a tapa ‘buraco’ cu fondo di refineria, e ta splica.

“Ya caba gobierno a uza riba 90 miyon Florin di entradanan ricibi for di traspaso cu a tuma luga di refineria pa Pais Aruba. Esaki ta fondonan di e benta “sales and marketing”, como tambe di e traspaso di Valero y propiedadnan, na Gobierno di Aruba.” Segun sr. Oduber, esaki ta significa cu practicamente a uza 90 miyon den prespuesto supletorio di aña 2016 cu a wordo trata na december y e presupuesto 2017. Entradanan cu tabatin a base di acuerdonan cu tin cu e refineria cu a bay simplemente pa paga gastonan coriente di Gobierno, sin cu esaki a bay den un inversion cu pueblo di Aruba por wak. Ora cu mira kcio e buraco aki tabata, un deficit cu berdad den 2017 awo ta pinta un presupuesto bunita, un presupuesto cu tin un tekort di 0.5%, manera cu e acuerdo ta cu CFT di 27 miyon. Pero den esaki casi 90 miyon di dje a wordo cubri, pues eigenlijk e deficit aki mester ta riba 100 miyon Florin. Pasobra 90 miyon di dje a wordo cubri pa un entrada incidental, consecuentemente e 90 miyon aki ta bin bek den e presupuesto despues di eleccion pa aña 2018.

2018: Deficit riba 140 miyon
Gobierno mester cuminsa splica con e ta bay cobra tur e gastonan adicional cu ta bay bin y no solamente e 90 miyon aki. Por ehempel hospital cu ta bay costa 30 miyon Florin pa aña cu mester bay wordo paga na e PPP project, como tambe na 2018 cu e gobierno mes a bisa cu na momento cu e vierbaansweg keda cla, mester cuminsa paga un suma di mas o menos 25 miyon Florin tambe. Pues ya ta papia di awe di un presupuesto cu mas cu 140 miyon Florin di deficit pa 2018.

Sr. Oduber ta enfatisa cu Gobierno mester ta sincero cu e pueblo y mester splica awe kico e ta bay haci. Esaki ta un di e 9 puntonan pa cual sr. Oduber a hiba discusion interno fuerte unda cu no por a yega na acuerdo, pa cual a conduci na e decision cu a tuma november aña pasa.

Bista presupuesto 2017
Si mira presupuesto 2017 ta mira cu for di Setar lo saca ganashi di 3 miyon, di Utilities tambe gran cantidad di suma pa cubri deficit di e presupuesto aki. Si mira loonbelasting ta mira cu e ta wordo calcula na un suma adicional lo wordo cobra di 15% riba locual cu a cobra na 2016. Segun nan ta splica, lo yega na e calculacion aki door di cobra belasting mas fuerte, ta papia di reapertura di refineria cual no tin inidicacion di ki dia ta cuminsa opera. Esaki ta haci cu ta pone metanan irrealistico y ta haci cu despues di eleccion ken sea cu asumi e responsabilidad hunto cu nos, lo mester bay carga e peso cu Gobierno actual ta lagando atras, sr. Oduber a bisa.

Pa loke ta winstbelasting tambe ta pone cu lo bay genera 15% di winst, (cu mesun argumentonan ya menciona) y crecemento economico. Mientras cu Banco Central ta papia cu lo no tin crecemento economico e aña aki. Tambe ta menciona 11% aumento di BBO, unda cu tambe ta uza mesun argumentonan ariba menciona. “Pues mas di 30 miyon Florin extra ta wordo papia di dje cu Aruba lo genera cu apertura di refineria cu te ainda no sa ki dia e ta habri. Te ainda no sa cuanto hende nan ta bay tuma y cu no sa ki tempo e ta bay cuminsa genera fondo pa Pais Aruba”, sr. Oduber a bisa.

Concluyendo e lider a bisa: ‘Nos si ta prepara nos mes den e proceso di e programa cu kier ofrece na pueblo cu solucionnan. Nos si a compromete caba y nos a bisa y nos no ta sconde, cu lo implementa un cambio fiscal caminda ta bay di belasting directo pa indirecto. Caminda cu tur esunnan cu no ta paga belasting na e momentonan aki cu ta suma rond di 50 pa 60 miyon Florin segun expertonan, e ora si nan lo paga belasting. Tambe mas ainda considerando e efectividad cu ta crea ora cu bay di impuesto directo pa indirecto.

‘E gobierno cu ta sinta aworaki tambe a priminti esaki, no a implementa esaki pasobra tabata kier keda bon cu pueblo y kier keda esun cu ta unicamente haci cosnan bunita. Cual awe ta mira e consecuencia’, sr. Oduber a termina bisando.

Expresionnan haci den e articulo aki no necesariamente ta refleha opinion di ArenaPoliti.co