Pero Mike a hinke den lachi pa cumpli cu e farce berde    

Ya for di 2008 diferente stakeholders na Aruba a traha riba un strategia pa asina haci Aruba un Pais sostenibel. Na 2010 nan trabou a culmina den e rapport Nos Aruba 2025. Un rapport amplio cu a conta cu e input y sosten di un grupo grandi di nos comunidad cu participacion di hoben, empresario, medio ambientalista, gremio, sindicato, gobernante etc etc cu a formula nan deseo y e caminda pa cana pa yega na un Aruba sostenibel di berdad. Lamentabel ta cu e rapport Nos Aruba 2025 no a wordo implementa. Na momento cu Gabinete Eman a yega na mando, Mike a djies hinke den lachi pa asina e por cumpli cu e farce berde cu nos ta mira na Aruba na e momentonan aki.

Nos Aruba 2025, relevante y internacionalmente premia 
Nacionnan Uni a bin cu 17 meta pa logra desaroyo sostenibel mundial y na Aruba un comicion a wordo lanta pa haci un inventarisacion con Aruba ta para y kiko mester wordo haci pa por logra e metanan aki. Pa e tarea aki nos ta convenci cu e informacion compila den e rapport Nos Aruba 2025 cu ta data di 2010, ainda ta relevante pa e tarea aki. Lamentabel ta cu nos no ta tende Minister Eman of esnan encarga cu e tarea aki menciona e nomber di e rapport Nos Aruba 2025. Con cu bay bin e rapport Nos Aruba 2025 ta algo visionario haci specialmente pa nos Pais y cu ademas a gana premio internacional pa e forma con un grupo grandi di nos comunidad a participa pa pone un strategia den otro pa nos sostenibilidad di berdad. Un rapport asina relevante y internacionalmente premia no por a djies wordo hinca den kashi y wordo lubida.

Cambio di farce berde pa sostenibel di berdad 
Nos mester atende cu e tema di sostenibilidad di nos Pais na un manera serio. Sostenibilidad no ta ora cu sponsernan di campania ta haya parkenan solar, of Phillips ta haya e previlegio pa deliver 12 mil luz di LED pa Eman pega rond di Aruba, of un tal Leoncita haya chens pa deliver klinker, piedra y santo pa Green Corridor pa cual naturalesa a wordo malamente roza y destrosa. Esey no ta sostenibilidad, esey ta e farce berde pa acomoda sponser y sostenedor di partido AVP. Aruba mester un cambio den cual tur nanishi ta dirigi riba e bienestar y sostenibilidad di berdad pa nos Pueblo y Pais. Nos Aruba 2025 a mustra nos un caminda realistico pa Aruba por bira sostenibel di berdad. Den un proximo gobernacion di MEP nos lo haci debidamente uso di e informacion di e rapport aki y nos no lo tene berguensa pa mustra mundo e producto, e vision y deseo di nos mesun Pueblo pa e sostenibilidad di berdad di nos Aruba stima.

14 maart 2017

Expresionnan haci den e articulo aki no necesariamente ta refleha opinion di ArenaPoliti.co