ORANJESTAD – Den presencia di coleganan Minister y Parlamentarionan, como tambe di Oficina di Monumento, Minister President Mike Eman a pone diamars atardi e seyo di ‘Monumento Proteha’ riba edificio di Bestuurskantoor riba L.G. Smith Boulevard. Esaki ta e prome di otro edificionan cu tambe ta bay keda identifica como patrimonio historico y cultural di Pais Aruba, garantisando asina nan proteccion pa futuro generacionnan.

“Awe ta un dia en berdad hopi grandi pa Pais Aruba pasobra nos ta bay pone un seyo di conservacion riba un edificio historico y monumental, pero tambe un edificio cu tin su vinculonan profundo cu e gobernacion di nos pais,” Premier Eman a cuminsa na bisa na e ceremonia. Mas special ainda pasobra nos ta “den e siman cu nos ta celebra e autonomia y status aparte di Aruba, e edificio aki a hunga un rol prominente desde e prome momento cu Aruba a logra e prome fase di su Status Aparte.”

Prome Minister a recorda con ora di e Eilandenregeling y finalmente culminacion di su status aparte na 1986 e prome Conseho di Minister a tuma asiento den e edificio aki y e prome Prome Minister den e oficina directamente ariba di unda ta poniendo e seyo. Den transcurso di añanan tabatin debate si ta bende e dificio aki y ta construi otro acomodacion manera hotel.

“E tempo ey nos a forma parti di e debate publico pa bringa y lucha pa conserva e edificio aki. Pesey cu un sentimento adicional di emocion, di orguyo mi lo pone e seyo riba e edificio sabiendo cu e edificio aki hamas y nunca e edificio aki por bay perdi y nunca mas por bira un hotel of algo otro cu e edificio monumental cu e ta pa sirbi interes general di pais Aruba como sede di gobernacion di Pais Aruba,” Prome Minister Mike Eman a expresa.

Finalmente, el a gradici e ekipo di Oficina di Monumento pa e elaboracion di e seyo y e trabou balioso cu nan ta haci pa rescata, restaura y preserva e historia y arkitectura di Aruba. Refiriendo na e seyo, Premier Eman a bisa: “E ta un seyo cu por ta chikito den tamaño, pero mescos nos himno ta bisa: “n’ tin nada pa kibr’e” y cu e seyo aki no tin nada pa kibra e edificio aki y e lo tey pa semper hunto cu nos. Danki pa esey.” 

Expresionnan haci den e articulo aki no necesariamente ta refleha opinion di ArenaPoliti.co