Esnan responsabel MESTER carga nan responsabilidad

ORANJESTAD – E siman aki fraccion di MEP a entrega un peticion pa hasi un investigacion profundo na e escandalo di Hedging na WEB. Segun e lider di e fraccion geel sra. Evelyn Wever-Croes hopi hende ta puntra con a para cu e asunto aki, pasobra ta parse cu cos a keda keto. (Click aki pa lesa e peticion)

“Pesey mi ta informa cu nos si a sigi traha riba e tema aki y nos a hasi nos investigacion. Pa cuminsa nos como parlamentarionan a wordo limita y stroba den nos trabou pa cuestiona WEB y Utilities debidamente, pasobra nos a haya e rapport y den algun ora a reuni cu WEB y Utilities, y pa colmo nos a haya 3 minuut so pa hasi pregunta.

Pero locual cu nos por a constata ta cu e rapport di Price Waterhouse Coopers no ta completo. E rapport mes ta splica con limita Price Waterhouse Coopers tabata den nan tarea y posibilidadnan.

Price Water House Coopers mester a limita su mes na un parti chikito di e proceso di hedging, esta solamente internamente den WEB. Mientras cu e proceso ta mucho mas amplio, e ta cuminsa na e team di hedging na WEB, pero ta envolvi tambe directiva di WEB, hunta di comisario di WEB, directiva di Utilities, hunta di comisario di Utilities y gobierno, especialmente Mike de Meza y Mike Eman. Pero PWC tabata mag di investiga solamente e team di hedging y e directiva di WEB, y di e rapport a sali cu no ta nan mester carga responsabilidad. Pesey nos mester sigi investiga te ora nos yega na esnan responsabel.

Tambe PWC a splica cu nan tabata mag di papia solamente cu esnan cu WEB permiti nan papia cune, y nan tabata mag di investiga solamente documentonan cu WEB duna nan. Pues nan mes no por a hasi mas investigacion, y pesey tambe e rapport di PWC no ta suficiente profundo.

Un di tres punto sumamente importante ta cu PWC ta bisa cu nan no por a verifica e informacion financiero cu nan a inclui den nan rapport. Ta con anto gobierno kier pa Parlamento forma un opinion? Imposible!

Algun tempo pasa un persona a wordo manda cas pasobra un recibo di WEB a cai den man di prensa. Awor cu pueblo ta wordo horta e alivio di 800 miyon florin, ningun hende ta wordo manda cas? Esaki no por. Nos tin indicacion fuerte caba cu e responsabelnan ta minister Mike de Meza y minister Mike Eman, y nos lo sigi investiga te yega na fondo di e escandalo aki pa asina e pruebanan bin riba mesa. Nos kier pa Algemene Rekenkamer hasi un investigacion pa despues determina si nos ta bai pa Ministerio Publico of pa un encuesta parlamentario. Pero en todo caso, e cos aki no ta keda te akinan” lider di MEP Evelyn Wever-Croes a duna di conoce.

Expresionnan haci den e articulo aki no necesariamente ta refleha opinion di ArenaPoliti.co