WASHINGTON/ORANJESTAD - Director ehecutivo di Fondo Monetario Internacional pa Hulanda na Washington DC, sr. Menno Snel tabatin un encuentro cu Prome Minister Mike Eman unda nan a papia riba e prospectonan economico di Aruba. Snel a haya cu e reunion a bay den un bon ambiente. "Nos a papia encuanto turismo, nos a papia en extenso di e plannan di inversion cu gobierno ta considerando pa haci ainda. Tambe nos a papia en general di e isla mes."

Snel a splica cu a papia en general riba e situacion economico/financiero di Aruba. "Mi ta contento si di tende cu algun preocupacion cu IMF tabatin prome pa loke ta e deficit di Aruba, awor ta mustra miho cu antes. Mi ta satisfecho cu esey. Ainda tin hopi iniciativa andando riba e isla y e gobierno aki ta dispuesto pa sigui cu e iniciativanan aki." Snel a conta un poco loke IMF ta haci na Washington den caso di Aruba. Hulanda ta miembro di IMF y Aruba tin areglonan special cu IMF. "Esaki ta encera cu IMF ta check e economia di Aruba un bes pa aña y ta traha un rapport di esaki cada dos aña. Nos ta wak kico por bay miho y tambe IMF ta duna conseho riba economia na gobierno di Aruba."

Como instituto IMF semper tin conseho pa duna y tambe tin bes por indica unda e isla por haci miho. "Nos ta satisfecho con cierto asuntonan ta bayendo na Aruba, manera e asunto di pensioen, di cuido medico, mescos tambe di finanzas publico y e deficit ta mustra miho cu algun aña atras."

Expresionnan haci den e articulo aki no necesariamente ta refleha opinion di ArenaPoliti.co