1.  Mirando e hecho cu e situacion financiero-economico di Aruba ta encontra su mes den un situacion di un estado di emergencia, locual por cierto a ser confirma door di IMF, door di Gobierno di Reino mediante KB, CFT, y CAFT, door di e “ratingsburonan” internacional Fitch y Standard & Poor’s, door di AHATA, ATIA, Camara di Comercio, y door di practicamente tur e socionan social cu a abandona e Dialogo Social fracasa, y door di comercio practicamente den su totalidad, y door di comunidad;

2. Mirando e hecho cu Aruba – despues di e ciere di e refineria – a keda cu unicamente 1 solo pilar economico, esta turismo, cu su so no por carga economia di Aruba y cu ademas den futuro lo enfrenta y confronta reto- y desafionan serio, manera e re-apertura di Cuba pa turistanan Mericano;

3. Mirando e hecho cu – no obstante cu e gobierno di Mike Eman, sin ningun transparencia, y den cooperacion NO-TRANSPARENTE cu Valero, a dicidi pa desmantela e refineria – Parlamento di Aruba a aproba un mocion pa pone “on hold” y para e desmantelacion di e refineria te dia 31 di december 2015, di manera cu por evalua y investiga cualkier posibilidad real y realistico di un re-apertura/continuacion (“doorstart”) di e refineria mediante cumpradornan/operadornan potencial;

4. Mirando e hecho cu un experto den asuntonan internacional di refineria, y anterior gerente di e refineria di Aruba, esta sr. Nelson English, den algun presentacion convincente a demostra cu e refineria di Aruba, mirando e aspecto technico, economico y comercial, tin posibilidad- y derechonan di existencia, pero cu ta unicamente un decision corecto di gobierno di Aruba lo por realisa y duna un buelta positivo den e direccion di e negociacionnan entre Valero, cumpradornan/operadornan potencial y e propio gobierno;

5. Mirando e hecho cu prome minister Mike Eman den articulo 2 di e protocol firma dia 2 di  mei 2015 cu e gobierno di Reino, a indica cu ya e mes no por controla (beheersen) ni dirigi (besturen) e situacion financiero di Aruba, y cu tampoco e tin un plan di recuperacion (herstelplan) economico duradero, realistico y diversifica, pero tampoco un alternativa  economico riba termino corto pa e refineria;

Nos Ta Aruba ta haci un yamada na tur esnan den e comunidad Arubano cu ta dispone di cualkier informacion al respecto, pa publica, y informa comunidad si nan sa di cualkier potencial cumprador/operador pa e refineria, y pa pasa e informacion aki na gobierno, Parlamento, S.E. Gobernador, y na Prensa, y ta recomenda cu:

a. Gobierno di Aruba – na un manera transparente – mediante Parlamento ta nombra un comision cu mester dirigi e negociacionnan entre Valero, gobierno y e potencial cumpradornan/operadornan;

b. punto di salida na e negociacionnan aki ta, cu e wafnan di e refineria ta propiedad di Pais Aruba, y cu - cu compra di e refineria e wafnan - ta ser gehuur (“leased”, “rented”) cu e operador nobo;

c. Gobierno di Aruba ta tuma e decision riba locual ta menciona aki’riba mas tarda dia 30 di  juni 2015.

Aruba, 18 di juni 2015,
Nos Ta Aruba,



Jan de Ruijter,                                                                        Melva Croes,
Voorzitter,                                                                              Bestuurslid,
E: This email address is being protected from spambots. You need JavaScript enabled to view it.                                                This email address is being protected from spambots. You need JavaScript enabled to view it.
(297) 739-9241                                                                      (297) 592-8461

Expresionnan haci den e articulo aki no necesariamente ta refleha opinion di ArenaPoliti.co