ORANJESTAD – Despues di bishita e trabounan di renobacion y restauracion di Rosa College na Oranjestad, Minister President Mike Eman a indica otro proyectonan cu Gobierno tambe lo cuminsa cu ne e aña aki. Mas satisfactorio ainda pa e mandatario ta di por wak cu sector priva ta siguiendo e ehempel di Gobierno y tambe ta wak e balor potencial di monumentonan historico y pa nan mes, pa economia y pa destinacion Aruba.

Ex edificio di John F. Kennedyschool y di Departamento di Obranan Publico (DOW) ta programa pa inicia e aña aki rescatando ambos monumento cu gobierno anterior na Gabinete Mike Eman I y II a laga bay den deterioro, pero cu tin un nificacion grandi pa e identidad di Pais Aruba. Nan lo haya un bida y proposito nobo ya cu e prome ta destina pa bira sede di Departamento di Enseñansa, mientras cu e di dos lo fungi como oficina central di 'Aruba Tourism Authority'.

E iniciativa di sector publico ta uno cu a cuminsa wak ta ripiti cerca comerciante y otro propietarionan den Oranjestad. Mas recientemente, den Wilhelminastraat, ta mira cu ta cumprando edificionan bieu y restauranan na nan gloria original pa sea huur na comerciantenan nobo of ocupa nan cu nan propio oficinanan.

Otro ehempel ta edificio di ex-Voogdijraad den Emanstraat cu den pasado tabata Censo y Eilandsraad. “Esaki ta un edificio cu a yega na acuerdo cu Renobacion Aruba N.V. cu nan lo tuma e restauracion riba nan mes y den e edificio aki lo bin Departamento di Automatisacion di Aruba (DIA). Asina e colaboracion entre gobierno y sector priva ta bay garantisa un restauracion hopi grandi di henter pais Aruba,” Minister President Eman a finalisa bisando. 

Expresionnan haci den e articulo aki no necesariamente ta refleha opinion di ArenaPoliti.co