Den e prome frase di e raport di IMF riba economia y finansa publico di Aruba, e institucion internacional aki ta papia di e "double-dip" cu economia di Aruba a sufri den ultimo ocho aña. E prome 'dip' ta e crisis financiero y economico mundial cu a pone economia di Aruba cay di +2% pa -11% den dos aña. E didos 'dip' ta e ceramento di e refeneria na 2012. Apesar di e "double-dip" aki, IMF ta mustra cu economia di Aruba a crece atrobe cu 4.5% na 2014 y ta spera di crece cu 2.25% na 2015. Niun pais den Reino Hulandes ni pafor di Reino Hulandes a conoce un caida den economia y su consecuencianan social manera Aruba. Niun pais den Reino Hulandes of pafor di Reino Hulandes a conoce un recuperacion economico asina grandi y den asina poco tempo. E unico splicacion pa esaki ta e maneho cu gobierno di Aruba a hiba! Gobierno a usa fondo publico pa haci hopi pa logra esaki: mehora forsa di compra di esnan cu entrada mas abou. Inverti hopi den infrastructura y crea trabou. Stimula turismo y cuminsa crea un sector economico nobo di energia renovabel cu IMF ta yama prometedor. Awor ta tempo pa reforma finansa publico tambe, door di reforma di entre otro nos sistema di belasting, e sistema di subsidio y reforma di sector publico cu ta costa pueblo mucho hopi. Pa esnan cu ta kere cu nos ta cla, e contesta ta no! Pero e resultadonan di cinco aña ta mustra cu e caminda cu nos a scohe pa saca nos pais for di e pio crisis di "double-dip" cu nos a yega di conoce, ta esun corecto!

FONDO DI PUEBLO PA PUEBLO
E consecuencianan di e crisis pa Aruba tabata enorme. Desempleo a pone mas cu 12% di trahadornan a keda sin trabou y nan famianan sin entrada. Forsa di compra a cay pa tur sector di pueblo. Ta pesey a usa fondo publico pa stimula economia y crea trabou pa pueblo. Pesey a usa fondo publico pa mehora forsa di compra di trahadornan, yuda trahadornan den sector priva cu un extra ayudo cu e "reparatietoeslag" cu a sali di caha di gobierno. Pesey tabata sina importante pa yuda esnan cu poco of sin entrada, manera e mamanan soltera y esnan cu onderstand. Pesey tabata asina importante pa yuda e casi 15 mil pensionadonan y nan famia cu tabata depende di e pensioen di behez (aov) so, cu e "reparatietoeslag" cu tambe a sali di caha di gobierno. Tur esey ta desicionnan cu gobierno di AVP sosteni pa e fraccion di AVP den Parlamento a tuma pa pone economia crece atrobe y yuda esnan den mas necesidad. Otro consecuenciannan di e crisis tabata e falta di inversion y confiansa pa inverti pa economia crece. Atrobe ta gobierno sosteni pa fraccion di AVP den Parlamento cu a usa fondonan di gobierno pa inverti den turismo, den infrastructura di centronan di ciudad y di barionan, den scolnan y cayanan, pa duna empuhe pa crea trabou. Sector priva a sigui cu nan inversionnan ora nan a wak e iniciativa di gobierno. Esaki ta con Aruba a sali di e abismo cu MEP a laga nos aden y a cuminsa cana atrobe!

Expresionnan haci den e articulo aki no necesariamente ta refleha opinion di ArenaPoliti.co