Hopi ta e noticianan, argumentonan, hustificacionnan entorno e asina yama "HEDGING" cu tabata circula.
Nos a tuma nota cu den Parlamento tambe a discuti ampliamente riba e topico aki, sin ningun, pero ningun resultado.

Hecho ta cu e decision di "HEDGING" ta un eror hopi grave. Den cualkier democracia bibo y den un gobernacion basa riba principionan di " Good Governance", na unda entre otro e principio di "accountability" ta evidente, un of mas hende mester ser poni responsabel pa e acto aki.
Sinembargo nos mester un biaha mas constata cu tin gañamento, manipulacion, encubrimento, etc etc. Pues actonan cu no a mag di mira luz di dia, y cu den mundo di e mafiosonan ta wordo yama "omerta" (the code of silence).

Den principio di e luna aki, nos por a sigui un discusion den 2de Kamer na unda e minister di Finanzas Hulandes a bisa cu ela considera di retira full e Raad van Commissarissen di un banco cu a regala nan mes un bonus di un paar di cien mil euro. Den e caso di e bonus aki e minister tabata na altura. Imaginabo cu e NO lo tabata na altura, mi ta convenci cu e lo a manda nan tur cas. Esey ami ta yama cumpli cu etica y moralidad cu mester rigi e gobernacion di un pais.

Den e caso di "HEDGING" e minister ta declara enfaticamente cu e no sa di nada. E pregunta ta e ora ey, DICON no a retira henter e RvC di Utilities y e Gerencia di WEB?? Y aki nos NO ta papia di algun cien mil euro, pero di hopi MIYONES di DOLLAR.
Si mi persona lo tabata e minister, ami SI lo a kita un pa un "op staande voet"!!
Of e minister ta gaña atrobe??
Of e minister un biaha mas a pone presion riba tur hende rond di dje pa nan keda keto riba e hecho cu e sa tur cos, y ta cu su conocimento y aprobacion e "HEDGING" a tuma lugar??
Den mi concepto no por tin otro motibo pa no a "donder op" tur e hendenan den RvC di Utilities y e gerencia di WEB.

Awor ta sali den medionan di comunicacion cu e director aparentemente lo acepta un pakete pa retira.
Con por ta posibel cu e director, cu supuestamente ta esun cu ta culpabel, lo bay haya un "diamond-handshake", siendo nos pueblo mester keda sufri pa motibo di e "blunder" aki??
Mi ta ripiti cu den e mundo di mafia e modus operandi aki ta ser yama "OMERTA"!! ""You don't tell on me, I don't tell on you""!!
Pues e ley mafioso aki ta pa scapa e minister Mike de M., y pa director di WEB no papia, lo bay pague un scat di placa.
Mira aki con e ley di "OMERTA" ta wordo aplica den su optima forma.
Ta obvio cu ta trata di mantene un silencio profundo door di esnan cu a bay di acuerdo. Y no ta importa cuanto esaki ta costa e pueblo, basta Mike de M. wordo protehi y scapa.
Pa nos ta mas cu obvio cu tin un encubrimento formal ta tumando lugar. Y esnan cu ta colaborando cu esaki, no por tin amor PATRIO.
Di e minister Mike de M. no por spera mucho.
E minister aki den pasado a demostra cu e NO tin amor PATRIO, ya cu ela yega di testigua contra nos pais caba, esta cometiendo un acto di traicion contra nos pueblo, den e caso di Race track. Door di e.o. e testimonio di e minister aki e pueblo Arubiano mester paga mas di 30 miyon dollar na algun mafioso na Miami, e.o . Bermello cu un biaha mas ta na Aruba, meti den e proyecto mafioso di Hospital, cu lo bay costa miyones di dollar mas di loke mester ta. Aki un biaha mas ayuda pa algun otro Arubiano, e.o. Frensel Giel. Pues amor patrio esey no tin.

Ban spera cu esnan den e RvC di Utilities y esnan den gerencia di WEB bin padilanti y papia e berdad. Tardi o tempran e berdad lo sali y e ora ey lo no tin pordon.
Ta p’esey U.P.P. lo sostene cualkier peticion pa haci un investigacion profundo, no solamente riba e "hedging" aki, pero riba tur tereno unda cu ta necesario, sea un "feitenonderzoek" of un investigacion forensico door di un instituto renombra y imparcial, of manera a ser sugeri caba, door di ARA.
Ta hopi cos di sconde mester tin cu awor AVP a nenga redondamente pa laga ARA haci un follow-up riba e "feitenonderzoek" riba e "hedging"!!

Ta den e cuadra aki, ni U.P.P. ni mi persona no tin nada di sconde; nos a manda un peticion na presidente di Parlamento y na tur fraccion den Parlamento pa bin cu un mocion cu mester tin den su dictum pa haci sea un "feitenonderzoek" of un investigacion forensico riba tanto e proyecto di dump como riba e proyecto di IMSAN.
Ta di spera cu e peticion ey SI wordo honra. Ningun integrante di AVP mester tin miedo di cualkier di e dos proyectonan ey, pasobra ta prome cu nan tempo.

Pero no mester keda solamente na haci e investigacionnan, pero mester tin un "follow-up" riba esakinan tambe, pa pone hendenan duna cuenta y eventualmente carga e consequencianan pa nan actonan tambe.

Ta p'esey U.P.P. kier ta hopi cla den esaki. Si U.P.P. mester haya confianza di nos pueblo, cada un persona cu haci daño na nos pais, lo ser poni responsabel pa esaki. Y esaki no ta un menasa, pero un promesa cu nos ta haci na e pueblo Arubano. Y esaki TA nos compromiso cu nos pueblo.

Pa evita cu den futuro nos pueblo un biaha mas wordo perhudica pa tipo di actonan asina aki, Aruba mester ser goberna bow di e estricto principionan di "Good Governance".
Y mester mara mannan di e politico.
Pa mustra cu tin seriedad, y cu tin e boluntad, partidonan cu representacion den Parlamento mester presenta iniciativanan di ley den Parlamento cu e fin aki, pa di e manera ey, mustra cu tin seriedad y sinceridad.
Si esaki no socede, e ora ey lo ta simpelmente: "Quitate tú pa’ ponerme yo"!!


Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, april 28, 2015

Expresionnan haci den e articulo aki no necesariamente ta refleha opinion di ArenaPoliti.co