E resultado di e encuesta di ArenaPoliti.co tocante un Mayoria Absoluto vs. un Coalicion ta cu 58% di participante ta prefera cu e siguiente gabinete cu goberna nos pais ta uno a base di un coalicion. E pregunta tawata ta: ‘Kico bo ta prefera como e siguiente gabinete cu lo goberna Aruba?’ E encuesta tawata tin dos opcion como contesta, sea ‘Un (1) partido a base di un mayoria absoluto’ of ‘Un coalicion di dos of mas partido hunto.’
Di e 773 votonan, 452 tawata pa un coalicion, y 321 pa un mayoria absoluto.
E resultado ta remarcabel considerando e dominancia di AVP y MEP durante e ultimo 16 aña. Ambos AVP y MEP a vocifera di ta bayendo pa un mayoria absoluto pa eleccion venidero. Na 2013 AVP y MEP hunto a logra obtene casi tur asiento (20 di 21). E dos partidonan aki respectivamente a goberna nos pais a base di un mayoria absoluto durante e ultimo 16 aña. E resultado ta duna indicacion di un falta di satisfaccion entre participantenan pa loke ta trata gobernacionnan a base di un mayoria absoluto. Tambe mester remarca cu e escogencia pa un coalicion no necesariamente ta significa un falta di sosten pa sea AVP of MEP.