ORANJESTAD – Durante un conferencia di prensa Minister di Salubridad Publico, dokter Alex Schwengle, a splica e ultimo detayenan di e prome “Health Care Conference Aruba” cu ta tuma luga den e prome siman di juni. E conferencia ta riba sugerencia di IPKO (Interparlementair Koninkrijksoverleg).

“Cu hopi placer nos ta anuncia e Conferencia aki na tur e partnernan di Reino,” e mandatario a bisa. Maneho en general di Salubridad Publico ta e tema principal di e Conferencia. “Esaki mirando tur e retonan grandi cu ta spera nos, principalmente den e area di control di gastonan”. E tendencia mundial ta cu e gastonan di e sector aki ta sigui subi, cu pa un pais chikito, manera Aruba of otro islanan di Reino Hulandes, ta dificil pa controla y mantene nan seguro general, mas ainda mirando e mercado chikito cu nan ta representa. “Esaki ta haci e retonan hopi mas grandi y dificil,” Minister Schwengle a señala esaki na momento di splica pakico e conferencia aki ta uno importante pa Salubridad Publico di Aruba.

Pa mantene e seguro medico general (AZV) cu tin aworaki, manera e ta, cu tur su retonan, mester yega na un forma di cooperacion entre e islanan Hulandes den Caribe. “E necesidad ey ta existi cerca e otro islanan y pesey e Conferencia ta uno grandi pa nos y nan,” Minister Schwengle a bisa.

Tin un interes grandi pa e encuentronan aki cu lo tuma luga riba dianan 1, 2 y 3 di juni cu ta conta cu participacion di e Ministernan di Salubridad Publico di Reino Hulandes y alrededor di 200 participante for di e mundo medico. Riba e prome dia e mandatarionan lo reuni y discuti un MoU, un palabracion pa cooperacion, cu ta bay wordo firma. Ta trata aki di e “International Health Regulation”, cu ta relata na un Tratado di Organisacion Mundial di Salud, cu ta determina e rekisitonan cu cada pais mester cumpli cune pa atende cu problemanan di salud, manera p.e. contaminacion. Den esaki cada pais tin su responsabilidad pa carga. E mandatario a agrega cu tin mas MoU cu ta bay wordo firma durante e conferencia  y tur ta na beneficio di Aruba y e otro islanan Hulandes.

Pa e conferencia aki a invita politiconan, pero tambe funcionarionan cu ta encarga cu maneho di Salud Publico, di e area di Inspeccion, seguro y esnan cu ta traha directamente den Salubridad. “Asina nos ta spera di haya un grupo mixto di e tres gruponan grandi cu ta traha riba e tereno aki.” E mandatario a pone hopi enfasis cu un bon maneho di Salubridad ta responsabilidad di un y tur den e sector.

Na final di e tres dianan di e conferencia lo presenta un documento cu ta wordo traha hunto cu PAHO y entrega na e Minister y Parlamentonan di Reino. “Intencion ta pa despues e Parlamentonan ratifica e documento aki como uno oficial.”

Den cuadro di e Congreso ta organisando e siman ey un “Health Week”, unda ta bay tin Expo Salud.  Comunidad di Aruba ta invita pa bishita e casi 50 boothnan cu ta bay tin den Renaissance Conference Center. Bus di Salud tambe lo ta presente pa haci e chequeonan pa cual nan ta conoci di ta haci.

Expresionnan haci den e articulo aki no necesariamente ta refleha opinion di ArenaPoliti.co