Noord ta cla, Paradera ta bou construccion y e otronan ta den proceso

ORANJESTAD – Cu MFA Noord cla pa habri oficialmente, MFA Paradera den construccion y otronan den proceso di planificacion, Prome Minister Mike Eman ta masha satisfecho di por presencia realisacion di e vision pa un mehoracion y innovacion den loke ta servicio publico den bario.

Hulpbestuurskantoor chikito den espacio y limita den servicio a keda pa pasado y awo Gobierno ta habriendo caminda pa habitantenan di nos diferente districtonan haya e calidad di servicio moderno y di calidad cu nan merece.

Prome cu Minister President Eman a asumi liderazgo di Gobierno, ya caba el a haci analisis di e necesidadnan primordial di nos pais. Entre rescata economia, mehora e poder di compra y hisa e nivel di producto Aruba, el a fiha riba su agenda di trabou innovacion di servicio publico den bario. Esaki, segun e mandatario tabata un necesidad grandi mirando con e Hulpbestuurkantoornan existente no por cumpli cu e demanda di poblacionnan creciente y exigente di servicio mas amplio.

Pa ehecuta un proyecto di e magnitud di MFA na un manera responsabel y cumpliendo cu tur norma di gobierno, ta rekeri tempo. Mientras cu e ekipo di trabou tabata traha riba estudio, plan di diseño y haci encuestanan den bario pa cumpli cu e necesidadnan specifico di cada region, Prome Minister a tuma e pasonan inmediato cu tabata na su alcance. El a dicidi pa amplia e servicio di Censo cu tabata disponibel na Hulpbestuurskantoornan rond di Aruba. Ciudadano por a haya mas servicio den nan bario mes, sin tabatin mester di a bay na e sede principal na Oranjestad pa algo simpel.

Tambe a reuni cu personal di e Hulpbestuurskantoornan pa involucra nan den e proceso di cambio. Actualmente e directiva y personal di Oficinanan Auxiliar di Gobierno ta canando un caminda di recapacitacion y motivacion pa asina actualisa nan conocemento y eleva e nivel di servicio na cliente. Prome cu e oficinanan nobo di Hulpbestuurskantoor den MFA keda cla ya caba e funcionarionan publico ta cla y prepara pa traha den un ambiente nobo, cu facilidad y ekipo moderno brindando asina atencion mas profesional na e usuarionan.

Na MFA Noord ta realisando e trabounan final pa tene su apertura oficial na luna di juni proximo. Mientras cu Santa Rosa ta trahando riba e areanan berde pafo, Elmar ta instalando panelnan solar pa e edificio genera su mes coriente paden, e directiva di MFA ta reuniendo cu e diferente servicionan cu lo ocupa e edificio, adicional na e Oficina Auxiliar di Gobierno manera Biblioteca Nacional y AZV. Tambe ta reuniendo cu organisacion, grupo y ciudadanonan di e bario pa asina coordina con MFA ta na beneficio di nan trabou comunitario.

MFA Paradera ya ta den su fase di construccion, na otro banda di caminda di e Hulpbestuurskantoor di e bario. Construccion ta bayendo segun schedule, mientras cu MFA Savaneta ta den proceso di destaho publico. Pa loke ta trata MFA Santa Cruz y MFA San Nicolas, e trabou di preparacion pa tereno y financiamento ta andando y nan ta e proximo pa habitantenan wak con e edificionan nobo, mas grandi y moderno ta bin ariba.

Prome Minister Eman tur siman ta sigui di cerca con e trabounan ta andando y ta rekeri un bon coordinacion entre Management Team di MFA, InfraTeam y otro departamentonan. Pa tur hende ta hopi cla cu esaki ta prioridad di Prome Minister Mike Eman.

Expresionnan haci den e articulo aki no necesariamente ta refleha opinion di ArenaPoliti.co