Un Evelyn Wever-Croes bastante contento a duna su reaccion riba e veredicto di su casa contra Diario. "Hues a bari tur e acusacionnan di Diario contra ami y mi casa for di mesa den un sentencia hopi elabora.  

Tocante e acusacionnan serio di labamento di placa, hues a bisa cu ta mustra cla cu e placa ta bin di un oficina di abogado y cu ta trata di transaccion entre un cuenta di banco y otro, y mirando cu tur banco na Aruba ta cai bou di control di MOT, tur hende por confia cu banco mes ta hasi e control ey. Den caso di labamento di placa ta importante di unda e placa ta bin y Diario mes a prueba cu e placa ta bin di un oficina di abogado, pues no tin motibo pa duda.

Cu ta trata di un compania di abogado nobo y no mucho conosi tampoco ta algo fuera di lo normal, e ta e forma cu hopi oficina di abogado ta traha, na Aruba y na Hulanda, segun e hues. No tin nada dudoso ni sospechoso na esaki.

Hues a bisa cu loke cu  Diario a hasi ta djis hasi redashi na forma con cu ta, 'klakkeloos". Diario a acusa nos di labamento di placa, pero a hasi esaki mucho lihe sin tin prueba den su man, y esey hues a desaproba completamente.

Ademas, Diario nunca a duna nos e oportunidad husto pa duna nos reaccion riba su acusacionnnan, y tur medio di prensa mester hasi esey prome. Es mas Diario a nenga di publica nos reaccion, y mi casa mester a paga pa saca un articulo den Diario pa duna su reaccion.

Diario a menasa di bin cu mas prueba, pero no a presenta NINGUN prueba den corte, y hues a haya cu e screenshot nan di banco a wordo manipula.

Hues ta considera e parti mas serio, ta unda cu Diario a instiga e donjo di trabou di mi casa pa duda den su integridad y asina pone su trabou na peliger. Esey e hues a condena mas cu tur cos.

Ta pa e motibo ey hues a yega na e veredicto cu Diario mester rectifica, y ademas mester paga un danjo di 5 mil florin. Un suma bastante halto, cu no ta usual pa wordo otorga den un kortgeding.

Ademas hues a condena e hecho cu Diario a reta nos pa bai corte, y pesey hues a dicidi cu no ta aplica e regla di tarifanan stipula, sino ta ordena Diario pa paga TUR gasto di abogado den e caso aki, Esaki tambe ta algo cu no ta usual na Aruba. Cu esaki bo por mira cla y raspa cu e hues ta desaproba totalmente locual cu Diario a hasi y kier duna un senjal cu e tipo di periodismo barata aki mester caba.

Naturalmente mi ta hopi contento cu e veredicto aki, pasobra tur e acusacionnan cu Diario a lansa contra ami, mi casa y mi tata, a wordo bari for di mesa, cu argumentonan hopi bon funda. Ta bon pa tur parlamentarionan di AVP tuma bon nota di esaki, y mi mes lo percura pa nan haya copia di e vonnis. 

Mi ta hopi satisfecho cu e veredicto aki, maske e no por kita tur e danjo cu Diario a ocasiona na mi famia. Importante ta awor cu segun un hues imparcial nos a papia berdad, y Diario ta esun cu a ganja. Ohala esaki yuda Diario realisa cu perodismo di riol no ta yuda ningun hende cu nada", Evelyn Wever-Croes a declara.

Expresionnan haci den e articulo aki no necesariamente ta refleha opinion di ArenaPoliti.co