No ta un secreto cu mundialmente hende muher den e forsa laboral y mas ainda, den posicionnan halto di maneho y liderazgo, no ta cos di tur tempo. Realidad awe ta cu hende muher a introduci su mes poco poco mas den e forsa laboral durante transcurso di tempo y aki na Aruba no ta diferente. Tin estudionan haci mundialmente y tambe na Aruba pa por observa specialmente e diferencia y e desaroyo den esaki. Tin hasta estudionan cu a resulta den indicenan pa observa e gap di diferente factor haciendo comparacionnan entre hende homber y hende muher, manera factor di educacion, salud y sobrevivencia, participacion y oportunidad economico y poder politico.  

Tin diferente motibo cu ta hunga un rol pakico hende muher no a integra facilmente den e sector laboral. Tampoco no ta un decision facil pa hende muher tuma pa bay studia y cumpli cu deseonan ambicioso di ocupa posicionnan halto den companianan, den sector publico, den comunidad of hasta den politica.  Cu te ainda hende muher ta den minoria representa den e sector laboral ta un realidad mientras cu e poblacion di Aruba ta consisti di 52% di hende muher. Esaki tin sigur su refleho tambe den politica.

Hende muher den e mundo laboral tin diferente obstaculo cu no ta haci’e facil pa e tuma e decision pa ocupa posicionnan clave y di responsabilidadnan grandi. Mayoria parti un aspecto cu no ta haci’e facil ta famia, pa haya un bon balans entre trabou, famia y responsabilidadnan domestico. Mirando cu e hende muher lo tin deseo di forma su propio famia, dedica na su bida familiar, porta yuda cu cuido di e hendenan grandi di nos famia. Tur esakinan ta haci e hende muher su tareanan hopi pisa pa combina cu trabou y mas ainda den posicionnan importante di responsabilidad y di liderazgo… y Evelyn tin e curashi pa haci tur esaki!

Pami, e solo echo cu como un hende muher Evelyn a tuma e reto pa asumi un responsabilidad asina grandi di liderazgo den un mundo di politica cu historicamente ta wordo domina pa e ser masculino, ta di gran admiracion! Den e poco tempo cu mi a siña conoce y traha cu Evelyn, awe mi por - no solamente bisa cu mi ta admir’e pa su curashi - sino tambe mi ta admira y aprecia su cantidad di oranan cu e ta inverti cu dedicacion den su trabou como politico. Ohala mas por tin e oportunidad di siña conoce di berdad! E ta un persona fuerte di caracter y ta tuma su responsabilidad hopi na serio. Evelyn ta un persona cu realmente ta preocupa pa Aruba y tin su curason sigur na e bon lugar… cu e pueblo di Aruba! Mirando e situacion actual di Aruba, ami ta convenci cu Evelyn tin e preparacion, capacidad y cualidad necesario pa hiba Aruba bek den un bon rumbo.

Evelyn a scoge, apesar cu e no ta un decision, funcion of tarea facil, pa traha pa bienestar y progreso di Aruba y ami como hende muher sigur ta apoya un otro hende muher den e reto aki. Ta un honor pami di por forma parti di partido MEP y sirbi mi pais den e mesun tempo cu Evelyn ta asumiendo e posicion di liderazgo… den mesun tempo cu historia di Aruba lo por wordo marca cu un ser femenino ta asumi pa prome biaha e posicion di un Prome Minister. Ami lo ta para band’i Evelyn como parti di su fundeshi pa yud’e guia Aruba den un mihor direccion… paso nos ta convenci, cu Dios su poder, cu Aruba lo sali di e tempestad aki… cu solo ta sali atrobe pa nos tur!

Expresionnan haci den e articulo aki no necesariamente ta refleha opinion di ArenaPoliti.co