Aruba ta sigui marca pauta 

ORANJESTAD- Un bes mas Prome Minister di Aruba Mike Eman ta forma parti di un delegacion Hulandes pisa durante e di 70 Asamblea General di Nacionnan Uni na New York. Rey Willem-Alexander y Reina Maxima ta wordo compaña pa cuatro Prome Minister, Rutte, Whiteman, Gumbs y Eman. Tambe Ministernan Koenders di Asuntonan Exterior y Ploumen di Comercio Exterior, secretario di estado di Infrastructura Mansveld y burgemeester Aboutaleb di Rotterdam ta forma parti di e delegacion Hulandes. Biaha pasa e tema di e cumbre di Nacionnan Uni, na unda Prome Minister a asisti y hiba discurso, tabata enfoca riba seguridad den SIDS ‘Small Island Developing States’.  E tema sostenibilidad – Millenium Development Goals/ Sostenibility Development Goals – ta e enfoke di e Asamblea General e biaha aki. Prome Minister Eman lo hiba palabra durante varios foro.

Metanan di desaroyo di e cumbre di Nacionnan Uni ta riba sostenibilidad cu ta extende nan mes durante e siguiente 30 añanan. Vision pa loke ta sostenibilidad di e isla chikito Aruba y su gobierno a traspasa frontera yegando asina leu cu Aruba ta constantemente riba plataformanan internacional den un luz global positivo. Aruba a bira e ehempel pa otronan. Na inicio di gobernacion di e prome Gabinete Mike Eman, gobierno a sali tur afo cu su agenda berde , cu ya ta conoci mundialmente. Banda di e vision aki, tin tambe e mision pa logra haci Aruba independiente di petroleo fosil na 2020. Un reto grandi. Aruba a logra gana confiansa di mundo henter pa e forma diligente cu su gobierno ta trahando den logra usa su fuentenan natural pa yega su meta y cumpli asina cu su mision. Aruba tin solo y biento na abundancia y ta rondona pa un lama cu olanan grandi cu tambe por genera energia berde.

Sin duda pa Aruba ta un orguyo cu su Prome Minister  Mike Eman ta participa na e Asamblea General di Nacionnan Uni y pa un biaha mas papia di e logronan di su isla te awor riba tereno di sostenibilidad.  Un parke solar grandi cu ta genera 3.6 megawatt y un proyecto solar pa scolnan di Aruba cu ta den desaroyo. Un parke di molina di biento cu tin algun aña den funcion y un otro cu ta den espera pa cuminsa. Pronto ta start cu e proyecto ‘smart community’ cu ta mustra di ta bay bira algo grandi pa e isla. Manera Eman mes a señala caba ‘E avancenan tey, pasobra cu gobierno ta pusha e tema aki”. Aruba a logra hopi caba. Ta bon si pa para keto y wak con e forum Sostenibility Development Goals  ‘SDG’ di UN ta duna un respaldo y guia den kico haci pa logra e otro vision di Aruba, esta prosperidad comparti.  

‘Assistant Secretary General for  small Island development States’ sr.Acharya’ a indica cu Aruba ta masha leu mes riba e caminda di sostenibilidad. Den su palabranan: ‘ Aruba a pasa e curva caba’. Pesey mes cu a pidi Prome Minister Eman pa papia di e vision di Aruba den e diferente foronan cu tin durante e dianan nos dilanti den e di 70 Asamblea General di Nacionnan Uni.

Expresionnan haci den e articulo aki no necesariamente ta refleha opinion di ArenaPoliti.co