Parlamentario mr. Xiomara Maduro:

A trata e tema di ‘trata de Mujeres’ den e Congreso di Coppal na Aruba

Recientemente Aruba tabata cede di e Congreso di Coppal riba Migracion den cual a trata entre otro e tema di Traficacion di Hende Muher. Den e conferencia aki nos a hiba palabra den representacion di partido MEP y a duna un bista di con e fenomeno aki ta na Aruba y kiko tur ta wordo haci pa combati esaki.

Esclabitud moderno

Traficacion di hende ta un delito cu ta priva su victimanan di libertad mas basico cual ta e derecho di ta liber. E ta un forma di esclavitud moderno cu no ta toca solamente esnan cu ta biba den pobresa, pero ta un delito den cual hopi biaha un hoben ta wordo priminti un trabou den exterior sea den administracion of modelahe pero en realidad nan ta wordo usa pa prostitucion, trabou di escort y servicio domestico sin pago. Na nos Pais tambe a presenta casonan di e forma di esclabitud moderno aki. Y no ta solamente hende muher pero na Aruba nos a conoce un caso den cual un hende homber tabata wordo usa pa traha manera catibo den negoshi y na cas pa trabou domestico. Mas recien nos a compronde cu tin hasta mucha muhernan jong cu nan passpoort ta wordo kita for di nan y nan ta wordo obliga pa atende cliente den bar y rumshops.

Esfuerso pa combati traficacion di hende

Ya for di 2006 nos ta haciendo un esfuerso na Aruba pa combati traficacion di hende door di penalisa e delito aki y institui un Task Force bou liderasco di sra Jeanette Richardson-Baars. E Task Force a haci un trabou grandi door di crea conciencia na Aruba riba e existencia di fenomeno di traficacion di hende y yuda pa casonan por a wordo investiga. Banda di esaki e Task Force cu yudansa di e Organisacion Internacional di Migracion OIM a traha un estudio ‘A situacional analysis of Aruba’s response to human trafficking’ den cual ta duna un bista di e situacion di traficacion di hende na Aruba y e manera con nos institutonan a reaciona pa combati esaki.

Mester uni forsa

Nos Pais ainda tin hopi reto nos dilanti pa por pone un paro na e delito di traficacion di hende. E task force mester wordo amplia pa asina por yuda amplia e conocemento di e instancianan envolvi pero tambe di e Pueblo en general y specialmente esnan cu ta imigra na nos Pais mester recibi informacion pa asina nan no wordo abusa pa esnan cu kier gana placa usando nan como obheto di comercio. Pa esaki nos a pidi e Paisnan cu ta forma parti di Coppal pa nos explora manera con nos por uni esfuerso pa asina por eradica e fenomeno aki cu ta toca hopi di esnan cu ta emigra na nos Pais for di Santo Domingo, Colombia, Venezuela, China, Philipina’s y India.

Dia Nacional contra traficacion di hende

Dia 18 di oktober proximo ta proclama como Dia Nacional contra traficacion di hende na Aruba y ta bon pa nos ta pendiente di e informacion importante cu e Task Force lo brinda riba e tema aki. Pasobra e ser humano no por ta obheto di comercio. Cada hende tin su diginidad, su valor propio y su derechonan.