ORANJESTAD – Recientemente, representantenan regional di REPSOL a haci un bishita na Minister di Asuntonan Economico, Comunicacion, Energia y Medio Ambiente, Mike de Meza, como tambe Utilities Aruba N.V. y Compania Arubano di Petroleo (CAP) N.V. E bishita di e representantenan regional a sigui despues cu siman pasa Minister de Meza a bishita e oficinanan principal, como tambe e centro di investigacion di REPSOL na Madrid.

Durante e reunion aki e representantenan di REPSOL a expresa cu e proyecto di exploracion di gas y petroleo den subsuelo di awanan teritorial di Aruba ta bayendo bon den e sentido cu e ta avansando bon y pa e prome cuartal di aña 2016 e consorcio lo dicidi si ta sigui cu e siguiente paso. Despues cu ya tin informacion di investigacionnan seismografico 2D (two-dimensional) y 3D (tri-dimensional) disponibel a haci un investigacion di e materia di nos subsuelo como tambe analisis di temperatura. “E ultimo fase aki a conclui recientemente y e update ta indica cu e proyecto aki ta ‘on schedule’,” minister de Meza a bisa cu hopi satisfaccion. REPSOL, hunto cu TOTAL di Francia y BG/Shell, lo tuma e decision na inicio di aña 2016 si lo perfora e subsuelo pa wak si di berdad lo tin gas of azeta y si e cantidadnan ta comercialmente atractivo pa e partidonan envolvi pa sigui cu e proyecto,” Minister de Meza a splica.

Minister de Meza a caba di haci un bishita hopi fructifero na oficinanan principal di REPSOL na Madrid. “E proyecto di exploracion den awanan territorial di Aruba ta un di e proyectonan cu ta progresando mas lihe di henter e cartera di Latino America y pa un gran parti esaki ta debi na e bon cooperacion cu nos ta ricibiendo di tur e autoridadnan di Aruba,” Minister de Meza a expresa. El a expresa cu hopi optimismo e ta sigui cu e proyecto y cu e ta spera cu e resultadonan ta positivo pa tur partido y cu por sigui padilanti. REPSOL tin bon presencia den Latino America y Caribe. Pa cu produccion, e compania ta activo na Venezuela, Trinidad y Colombia y nan tin proyectonan di exploracion na Aruba, Colombia, Guyana y Trinidad. Recientemente REPSOL a adkiri Talisman, cu ta pa e compania un activo importante na Colombia cu ta engrandece nan presencia den e region aki.

Expresionnan haci den e articulo aki no necesariamente ta refleha opinion di ArenaPoliti.co