UNESCO ta reconoce Aruba como Lider  

No tabata facil pa por a logra un reunion cu e funcionario mas halto den e organisacion di UNESCO mirando cu ta un total di 195 pais ta asocia cu UNESCO, pero Minister Otmar Oduber acompaña pa Minister di Corsow y Minister Plenipotenciario di St. Maaarten a sinta na mesa cu Sra. Irina Bokova, Directora General di UNESCO. E tabata un reunion riba nivel halto unda solamente e mandatarionan por tabata presente.
Durante e reunion, un biaha mas e esfuersonan di Aruba a keda reconoci pa e forma con nos ta fortalece e relacion di turismo y cultura. Un combinacion unda tur dos aspecto ta den balansa y ta reenforsa otro. Aruba ta tumando un posicion como lider den e ambicionnan di UNESCO.
Den e ambito aki Minister por a papia un momento extenso cu Sra. Irina Bokova  y  haci e invitacion na e funcionario mas halto di UNESCO pa ta presente na e conferencia di World Tourism Day na Aruba otro aña. Intencion ta pa durante e conferencia no enfoca solamente riba turismo pero kier a tuma e oportunidad pa demostra e rol importante di cultura den esaki riba un plataforma halto. Kier ilustra e beneficio economico cu turismo ta trece pa cultura y tambe cu cultura ta trece pa turismo. E ta bay pa crea calidad pa tur dos sector unda tur dos ta beneficia di otro.
Un mensahe fuerte cu Minister Oduber a logra trece dilanti pa Sra. Irina Bokova cu a wak un isla chikito manera Aruba, como un di e lidernan y ehempel pa otronan den e aspecto aki. A logra haya un bon momento pa Aruba resalta y Minister Otmar Oduber a logra laga un bon impresion atras.

Expresionnan haci den e articulo aki no necesariamente ta refleha opinion di ArenaPoliti.co