A pidi UNESCO pa dunan prioridad  

Diaranson Minister Otmar Oduber tabatin e honor di por a dirigi su mes den nomber di Aruba na e 204 pais presente na e di 38 Asamblea General di UNESCO na Paris, Francia. Esaki ta un privilegio pa nos isla mirando cu a pesar cu nos ta un isla asina chikito, Minister Oduber a haya e oportunidad di hiba palabra dilanti representantenan di e 204 pais rond mundo presente.
Na inicio di su discurso e mandatario unda a  duna honor na nos Papiamento, presentando cuatro  dicho cu ta refleha e mensahe cu a comparti cu tur presente na e Asamblea di UNESCO.
Durante su discurso a presenta e retonan, e prioridadnan y e importancia di nos herencia cultural como un isla chikito y den e ambito di e situacion mundial existente. Aruba a resalta cu su yamada pa pone prioridad riba SIDS (Small Island Developing States) y a haya un apoyo grandi pa esaki.
“Cada ken cu su forsa esey ta un realidad. Tur hende tin un sombra hasta den scuridad. Hende ta  keda hende no ban lubida . Si e zapato unta sirbibo bo tey cana forsa”, esaki ta e dichonan cu Minister Oduber a menciona na inicio di su discurso y a bisa cu esakinan ta bin for di un cancion Arubiano na Papiamento y su significado ta un refleho di e mensahe cu e ta spera di por comparti cu tur presente. “Nos tin nos forsanan, esey ta e realidad. Tur hende tin un sombra, inclusive den e lugarnan mas scur. Hende lo keda hende, por fabor no ban lubida esey. Si e zapato no a sirbibo, bo no lo por cana drechi”.
Minister Oduber a mustra su admiracion y sosten na UNESCO cu tin 70 aña den e lucha pa construi un paz duradero riba e base di solidaridad intelectual y e promocion di colaboracion. Tur esaki ta un fuente di inspiracion pa hopi pais, incluyendo Aruba.
E mandatario a presenta e retonan cu Aruba ta pasando aden pa salvaguardia nos herencia intangibel. El a bisa cu no ta factibel pa haya e experticio y fondonan local pa por haci esaki. Durante bishitanan na conferencianan manera esun di UNESCO ta haya hopi inspiracion topando cu coleganan y otro profesionalnan cu ta compronde cual ta e prioridadnan ribal nivel internacional, pero no ta facil pa sinta na mesa despues y boga pa cultura mientras tin reduccionnan den presupuesto tumando lugar, cual ta un tendencia na hopi pais. E retonan aki ta bira mas grandi ainda ora ta parti di un pais potente pero chikito. Seguidamente Minister Otmar Oduber a bisa cu e retonan aki no lo wanta Aruba atras, pasobra lo haci un yamada na nos partnernan, amigonan y aliadonan pa posiblemente duna nos visionnan nobo cu ta permitinos yega na e obhetivo colectivo... “Y mi lo sinta na mesa atrobe, mes tanto cu ta necesario. Mi tambe lo pidi UNESCO pa reconoce e reonan aki cu varios biaha ta caracteristicanan di paisnan chikito y cu dunamento di prioridad na e SIDS mester bira un realidad. Nos mester zapatonan cu ta pas”.
Por bisa cu Minister Otmar Oduber a presenta un enfoke sumamente skerpi pa loke ta e rol di e paisnan SIDS. El a haci un apelacion na UNESCO pa considera e paisnan aki den nan maneho general y haci di esakinan un prioridad tambe.
Por a mira cu publico presente tabata sumamente impresiona y tabatin palabranan di elogio pa Minister Oduber ora el a finaliza su discurso. Tambe el a ricibi hopi apoyo di diferente isla no solamente den Caribe, pero tambe na otro continentenan.

Expresionnan haci den e articulo aki no necesariamente ta refleha opinion di ArenaPoliti.co