Minister Oduber a reuni ehecutivo di World Heritage Center  

Minister Otmar Oduber ta na Francia pa un serie di reunion cu e organisacion di UNESCO. Un di e encuentronan tabata cu Sr. Peter Debrine Project Officer di e Unidad di America Latina y Caribe di e World Heritage Centre di UNESCO. E reunion aki tabata e preambulo pa e reunion cu e Directora General di UNESCO, Irina Bokova.

Sr. Debrine ta encarga cu e 'heritage sites' y ta wak con ta maneha esakinan di un forma sostenibel pa turistanan lo por admira lo cual ta herencia material mientras cu ta proteha esaki ta e por wordo conserva pa un periodo mas largo. 

Wolrd Heritage Centre ta papia hopi di turismo sostenibel, un turismo cu ta enfoca solamente riba explota un luga, pero pa por tin un balansa entre admira cultura y conserva pa turista y local.

Sr. Peter Debrine a mustra hopi entusiasmo pa cu e esfuersonan di Aruba. Nos isla ta tumando pasonan grandi pa crea conscientisacion riba calidad di turista nobo, pero tambe e calidad y importancia di cultura den esaki. Vision di Minister Otmar Oduber den e cuadro aki ta pa uza e beneficionan economico cu ta trece nos turismo, pa conserva y conscientisa riba nos cultura na tanto turista como local. 

Kedando riba e mesun tema a papia riba diferente tema relaciona na e conservacion di cultura y e balansa cu turismo. Sr. Debrine a comenta cu 6 luna pasa nan a bin cu un declaracion cu diferente paso cu lo por wordo tuma pa crea e balansa entre turismo y cultura. El a indica na minister cu conociendo y sabiendo mas di lo cual Aruba ta haciendo, nos isla ta riba e caminda di ta un ehempel. Esaki mirando cu hopi di e plannan cu ta wordo implementa na nos isla tambe ta wordo menciona den e declaracion.

Minister Oduber a probecha e ocasion pa invita Sr. Peter Debrine pa e conferencia di World Tourism Day na Aruba otro aña cu lo ta enfocando riba e conexion di cultura y turismo, poniendo cultura riba e mesun nivel di turismo pa su importancia economico y social.

Expresionnan haci den e articulo aki no necesariamente ta refleha opinion di ArenaPoliti.co