Minister Otmar Oduber actualmente ta na Hulanda cu un serie di reunion pa desaroya pasonan concreto na beneficio di cultura di nos isla. Durante su bishita Sr. Oduber a reuni cu Sr. Jan de Jong consehero di Ministerio di Educacion, Ciencia y Cultura di Hulanda. Durante e reunion a toca temanan sumamente interesante manera ta e maneho pa salvaguardia nos monumentonan publico pero tambe nos monumentonan priva. Minister Oduber den su maneho a percura y a tuma pasonan cardinal caba pa crea mas conscientisacion pa salvaguardia nos monumentonan publico y priva tambe.

Na Hulanda a crea hopi incentivonan cu ta canando hopi bon, unda sector priva ta sumamente entusiasma pa inverti den restauracion di monumentonan y tambe den compra di monumento. E mandatario di Aruba a mira e oportunidad pa indica e espacio cu tin pa colaboracion entre Hulanda y Aruba unda por haci uzo di fondonan pa inverti den proyectonan na Aruba pa asina cuminsa cu e proceso di proteha monumentonan priva.

Ya caba a sinta na mesa cu diferente partido importante manera ta Monumenten Bureau cu ta creando conscientisacion entre e sector priva riba e importancia pa proteha nos herencia cultural y tambe riba e importancia di comparti informacion adecuado. E informacion ta compila den un buki cu informacion tecnico cu ta splica riba ki base ta restaura un monumento. Pa duna e comerciante mas informacion di kico ta e posibilidad nan ora nos ta papia di monumento, y kita kisas un tiki di e miedo di comerciantenan pa inverti den monumentonan protegi.

Minister Oduber y Sr. Jan de Jong a combersa tambe riba e diferente incentivonan cu ya a presenta caba pero cu kisas por revisa. Por ehempel, den nos sistema di impuesto lo por trece incentivonan dilanti pa doñonan di monumentonan particular por haya un descuento den nan costo di "overdrachtsbelasting".

Un reunion cu a bay sumamente bon unda un biaha mas Aruba a resalta y a demostra di por ta un ehempel den nos region pa con nos ta  pro activo pa locual ta salvaguardia nos herencia cultural den forma material. A toca e tema tambe di e importancia di nos herencia material relata na nos herencia inmaterial cu tambe ta un punto di atencion na Hulanda. Aki tambe a mira un posibel colaboracion cu ta necesario y posibel cu nos madre patria.

Minister ta trahando pa bin cu inversionnan di afo den plannan relata cu nos cultura y arte pa salvaguardia e aspectonan aki.

Durante e reunion cu Sr. de Jong tabata tin intercambio di experticio, y ideanan pa haci uzo di fondonan disponibel cu lo por inverti na Aruba. Minister Oduber di su banda a laga sa kico Aruba ta haciendo creando un espacio pa haci uzo di fondonan internacional den e sector cultural, artistico y creativo.

Expresionnan haci den e articulo aki no necesariamente ta refleha opinion di ArenaPoliti.co