Den nos comunidad nos grandinan cu ta biba di pensioen ta cai sigur den un di e gruponan mas vulnerabel riba nos pais. Pesei e ta falso di parti gobierno pa propaganda cu nan lo haya algun florin extra siendo cu ta net for di nos grandinan Gabinete Eman a ranca hopi placa! Mester enfatisa cu banda di e hecho cu costo di bida a subi e entrada cu ta ricibi na pensioen no ta yega pa nada. Pa colmo e medidanan cu a wordo imponi pa AVP hustamente a dal e grupo aki na un forma directo y duro lagando nos grandinan cremencha tur luna. Den e comunicado aki nos lo elabora den corto riba e efectonan negativo y e status deteriora di nos grandinan. 

Normalmente prima di por ehempel AZV ta wordo carga door di dunador di trabou y e trahador. Un pensionado no tin doño di trabou cual ta nifica cu ora di subi prima di aseguro medico e so tin cu carga e peso completo. Ehempel di esaki ta un pensionado cu ta cobra un pensioen completo di 13.477 pa aña. Cual por cierto den ultimo añanan no a conoce ningun aumento significativo pero si a bai atras malamente. Ora e prima di AZV tawata 9.5% nos pensionadonan tawata paga na AZV 1280 florin. Bou mandato di AVP e prima aki a wordo aumenta cu 2% nificando cu e pensionado a haye forsa ta paga 268,54 mas (Pagando total 1549,85)! Loke a bin aserca desde januari 2015 ta e cobransa pa recoge sushi cual no mester lubida cu pa un pensionado e gasto aki ta dal hopi duro den su presupuesto limita pasobra ta 318 extra na gasto pa aña sin conta aumento di gastonan di coriente y awa. Normalmente mas o menos 40% di nan pensioen ta bay na gastonan di utilidad pero e ultimo aumento di 15% di coriente na oktober 2014 a haci e situacion aun mas pio. E disgusto t’asina grandi pasobra net nan cu ta usa bou di 500 Kwh a haya un aumento di tarifa, algo cu te awendia no tin un hustificacion! E aumento di 15% aki mas cu claro ta debilita e cartera di e pensionado. Si por ehempel ta 200 e pensionado ta custumbra di paga e la haye confronta ta paga 30 florin extra pa luna siendo e placa aki por a bai na comestibles. Como sifuera ta poco BAZV a wordo aumenta cu 2% cual nos propio Prome minister ta papia di 3 schakel. Automaticamente e medida aki ta afecta e entrada netto (entrada despues cu kita prima azv) cu e pensionado ta keda cune afectando su poder di compra. 



Pa duna un bista con atras nos pensionadonan a bai por mira e tabel akibou. (Tene cuenta cu cifranan ta un estimacion y por varia depende e situacion)

Basicamente e tabel ta indicabo cu pa aña Gabinete Eman ta ranca mas di 1.5 luna di pensioen di nos grandinan! Tur esaki ta sin conta e hecho cu tin diferente di nos grandinan den nos comunidad cu a wordo spanta cu cobransanan di belasting y nan a core hasi areglo di pago di sea 100 of 150 florin pa luna siendo cu den varios ocasion a constata despues cu tawata trata di cobransanan caduca! 

Otro dato cu ta hopi importante pa pueblo tene cuenta cune ta cu e entrada di pensioen no a wordo aumenta for di 2009 ni pa absorba perdida di poder di compra. Si compara e ultimo 4 añanan di gobernacion bou di MEP a aumenta e pension 5 biaha mandando di 900 florin pa 1057 florin. Pero bou di Gabinete Eman tawatin un total ignorancia pa esaki y a hasi como sifuera reparatietoeslag lo tawata e salbacion mientras na otro banda e medidanan tawata acumula y e pensionado castiga. Esaki ta di condena pasobra e entrada di pensioen ta limita y pa colmo no tin ningun tipo di proteccion social cu ta tene cuenta cu e dificultadnan cu nan ta pasa aden. Den mayoria di caso e placa no ta yega pa por bay supermaket pa cumpra cuminda debi cu esaki a bira caro ultimo tempo y no tin control di prijs. E hecho cu na Aruba nos NO conoce un canasta basico amplio ta algo di lamenta siendo cu esaki lo por a haci'e posibel pa nan por logra cumpra lo necesario pa alimenta nan mes tur luna sin preocupacion. E punto central di e comunicado aki ta cu Gabinete Eman semper a corda riba su mes y su mesun grupo ignorando e hecho cu e ser humano den nos comunidad mester ta central. Sigur ta di lamenta cu ta presta hopi atencion na e parti infrastructura mientras nan mes ta empobreciendo e pueblo dia pa dia.

Expresionnan haci den e articulo aki no necesariamente ta refleha opinion di ArenaPoliti.co