Partido UPP por a tuma nota den e ultimo dianan aki un bay y bin, particularmente di parlamentarionan di e partidonan mas grandi aki na Aruba, tratando di busca merito pa e logro di reapertura di e refineria aki na Aruba, mientras cu e ultimo palabra no ta bisa ainda.
UPP kier a haci un apelacion na nos Parlamento, pa no cuminsa bende e cuero prome cu mata e baca, mirando cu ta trata aki di un algo importante no solamente pa e parti socio-economico, laboral y financiero di Aruba, sino tambe mester tin su otro aspectonan manera salubridad, ambiental, huridico, y di interes general di pais Aruba.

Manera UPP a pone den su programa di partido, cu e.o. puntonan importante di salida di UPP ta cu na momento cu ta stimula economia, esaki mester ta basa riba un desaroyo duradero, pero cu respet pa naturaleza.
UPP ta respeta y ta na fabor pa stimula iniciativanan particular cu ta contribui na e crecemento economico, social y spiritual di nos pueblo, y cu ta desemboca den e prosperidad y bienestar pa nos pueblo.
Pues UPP ta kere cu mester duna na e inversionista, tanto local como stranhero, e espacio pa haci negoshi y ganashi, pero poniendo nos hendenan y nos mama tera central, basa riba e concepto di People, Planet & Profit.

UPP tambe ta habri pa bisa cu den nos programa, mirando e “settlement agreement” entre gobierno y Valero, cu Parlamento na 2010 a aproba den su mayoria absoluto, cu na 2013 a scohe pa un Aruba sin refineria, mirando e desaroyo stanca na San Nicolas en particular.
P’esey UPP tabata faborece un desaroyo nobo y duradero riba e tereno, cu e.o. industria limpi y high tech, cu lo a stimula economia, percura pa un medio ambiente mas protehi, y un salubridad publico pa e pueblo di San Nicolas. Tambe e desaroyo aki lo mester a percura pa oportunidad pa nos yiunan cu estudio avanza, practica nan ofishi y conocemento como un centro di tecnologia moderno.

UPP tin di admiti, cu - ya caba desde e “crisis constitucional di ensure” y e binimento di Cft (awo CAft) na 2014, unda cu atraves di protocolnan y rapportnan por a mira e rumbo cu gobierno lo bay pa castiga e pueblo cu medida pa asina por cumpli cu Hulanda - UPP a adapta su pensamento riba Aruba sin refineria.
P’esey tambe den un di nos comunicadonan tocante nos situacion financiero pesimo, nos a vocifera di mira reapertura como un necesidad pa riba termino rapido por enfrenta e situacion di nos crisis economico y financiero di pais Aruba, cu na su turno tin efecto riba nos situacion socio-economico, na nivel nacional pero tambe na nivel di nos famianan, cu ya no tin entrada mas.
Pues den e caso aki UPP a sostene e reapertura.

Tambe UPP, na prome instante hopi convenci riba e punto di bista di Camara di Comercio, di un Aruba sin refineria, cu proyeccion di negoshi y industrianan riba e tereno menciona, a ripara caba cu tabata tin interesnan aheno pa desmantelacion di e refineria.
Nos por a ripara cu hendenan cu tabata den board di Kamer, tabata tin beneficionan directo cu e desmantelacion.
Tambe den seno di gobierno, particularmente rond di Mike y Mike, tabata tin hendenan cu a y ta mira beneficionan personal cu e terenonan cu bin liber.
Y tambe Valero mes, cu a haya e transhipment facility di e refineria.

Pues aki nos por mira cu e maneho tabata dirigi riba e otro “P”-nan, cu no ta esun di People, Planet & Profit. Mas bien tabata dirigi riba e concepto Profit, Profit & Profit pa un grupito.
Tur e interesnan aki ultimo, mester a hala un banda pa loke Hulanda a pusha p’e. Esta pa obliga gobierno toch, via di CFt, pa percura pa un reapertura.
Y si nos wak e declaracion di Minister Bermudez, e ta admiti di cu ta wanta e introduccion di ABB, pa duna oportunidad na un reapertura di e refineria.
Si esaki bira posibel, anto e ABB por bay den diepvries.

Ainda nos por corda con Mike Eman y su consorcionan a bishita Hulanda den un forma relampago, unda cu a bay papia riba e dilemma di Mike, entorno e reapertura y su politica “green”.
T’aki ta unda cu Hulanda a mustranan bon cla, cu si no tin reapertura di refineria, anto mester bin cu algo manera ABB. Aki ta unda cu gobierno di Aruba a doblega y a haye obliga pa bay papia cu CITGO.

UPP sigur kier duna credito na tur esnan cu lo por tabata tin un of otro aporte den realisacion di e eventual reapertura.
Pero na mes momento nos ta duna di conoce cu no ta na su lugar pa tin un bay y bin riba e asunto di ken su logra e ta. Hulanda tras di cortina tabata tin su presion riba esaki, mientras cu AVP mester a guli e pilder amargo aki.

Loke nos Parlamentarionan mester haci, ta pa for di un fase tempran, urgi na gobierno pa wak ki sorto di “settlement agreement” ta bay bin cu ne atrobe.
Pues mester mira interes di pais wordo sirbi na prome lugar, riba e puntonan cu nos a menciona aki riba.
Tambe wak pa ariba haya e transhipment facility di nos refineria bek, kico ta e fair share pa Aruba, e aspecto laboral pa proteccion di nos forza laboral, e medio ambiente, etc.
UPP ta kere cu ta desde e momento cu a cuminsa bira bisto cu di berdad ta bay traha riba e reapertura, Parlamento di Aruba mester a dirigi su esfuerzo pa mira cu resultado ta positivo den tur su aspecto.
Y no warda te ora cu cos ta cla, ta core sea defende of ataca un posibel acuerdo.

Pues UPP ta urgi pa stop di pleita ken a habri refineria y pone e interes di nos Pueblo y di Pais Aruba den discusion, den Parlamento y cu gobierno.


Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, december 17, 2015

Expresionnan haci den e articulo aki no necesariamente ta refleha opinion di ArenaPoliti.co