Diahuebs ultimo Parlamento di Aruba a trata e Presupuesto Supletorio 2015 di nos Pais. Gabinete Eman a bolbe gasta mas cu ta presupuesta y pesey mester a bin pidi Parlamento pa pidi mas placa. Tristo ta cu ora cu bo a kere cu nan ta bin pidi mas placa pa por haci inversion den cosnan necesario manera educacion, salubridad publico of pa combati crimininalidad, bo ta haya cu Gabinete Eman ta bin pidi placa pa hinca den proyecto Private Public Partnerships (PPP) pa asina por cumpli cu amigo y sponsernan di AVP.

Departamento di Gobierno y fundacionnan ta wordo corta pa PPP haya
Ta hopi biaha nos ta haya e reclamo cu na departamentonan di Gobierno y fundacionnan subsidia door di Gobierno e placa no ta yega pa cosnan necesario. Cada ves nan fondonan ta wordo corta y esaki ta dificulta e trabou cu nan ta haci pa nos comunidad. Diahuebs ultimo a bira bisto atrobe cu e preocupacion aki no ta relevante pa Gabinete Eman y tampoco e 13 parlamentarionan di AVP, ya cu nan ta prefera di corta fondo pa e departamentonan di Gobierno y fundacionnan pa asina nan por bolbe pusha mas di 1 miyon den proyecto PPP pa complace cu amigo y sponser di AVP.

Placa ta bay pa cumpli cu amigo y sponser di AVP
Riba pregunta di Fraccion di MEP, cuanto y ken Gabinete Eman ta paga for di e suma di 1,185 miyon cu ta bay pa proyecto PPP, nan a specifica e suma cu a ser paga na cada experto di e sigiente forma. A paga 535.500 na un consehero di transaccion, a paga 90.000 na consehero legal, a paga 50.000 na abogado di Pais Aruba, a paga 300.000 na consehero di medio ambiente y a paga 200.000 na experto di Rijkswaterstaat di Hulanda. Remarcabel ta cu Gabinete Eman no a pone nomber di ningun di e conseheronan cu a wordo paga cu fondo publico. Pasobra ta bisto cu nan ta e mesun hendenan cu ta amigo y sponser di AVP y pesey no por menciona nan nomber pa Pueblo no haya sa ken ta wordo beneficia na man di Gabinete Eman.

Awor Pueblo por bolbe wak unda e placa ta bay
Locual nos ta expone aki ta djies un ehempel di e tantisimo abuso cu tin cu fondo publico. Awor Pueblo por bolbe wak cu su placa di belasting no ta bay pa cosnan necesario sino mas bien ta bay pa yena e saco di e amigonan y sponsernan cu a yuda Gabinete Eman yega y keda na poder.


20 december 2015

Expresionnan haci den e articulo aki no necesariamente ta refleha opinion di ArenaPoliti.co